អ្នកនាំពាក្យ លោកស្រី Maria Zakharova បានសរសេរលើគេហទំព័រក្រសួងការបរទេសថា ប្រជាជនរូម៉ានី អាចមិនយល់ស្របនឹងការចោទប្រកាន់របស់រដ្ឋាភិបាលខ្លួនទេ ហើយផ្ទុយទៅវិញនឹងអំពាវនាវឱ្យមាន ការប្រើប្រាស់ហេតុផលសមស្រប ក្នុងការកំណត់ជំហរចំពោះសង្គ្រាមរវាងរុស្ស៉ី និងអ៊ុយក្រែន។ លោកស្រីគូសបញ្ជាក់ថា «យើងសូមបដិសេធការអះអាងទាំងនេះ។ ហេតុការណ៍ដែលត្រូវបានរៀបចំឡើង និងការឃោសនាជុំវិញហេតុការណ៍ទាំងនោះ បង្ហាញពីការប៉ុនប៉ងរបស់ថ្នាក់ដឹកនាំរូម៉ានី ក្នុងការបិទបាំងសកម្មភាពគ្មានទំនួលខុសត្រូវ ដើម្បីតែគាំទ្ររបបទីក្រុងកៀវ។ រូម៉ានីនឹងទទួលការឆ្លើយតបវិញយ៉ាងសមស្រប»។ ក្រសួងការបរទេសរុស្ស៉ី បានឱ្យដឹងថា ការតវ៉ារបស់ប្រទេសរូម៉ានី ដែលថាដ្រូនរុស្ស៉ីបំពានដែនអាកាសរបស់ខ្លួននោះ គឺគ្មានមូលដ្ឋាន ហើយប្តេជ្ញាឆ្លើយតបចំពោះការបណ្តេញអ្នកការទូតរុស្ស៉ីម្នាក់ ចេញពីទីក្រុង Bucharest។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី២៩ ខែកក្កដា ឆ្នាំ២០២៦។ គួរបញ្ជាក់ថា រូម៉ានី ដែលជាប្រទេសសមាជិកនៃអង្គការណាតូ (NATO) បានសម្រេចបណ្តេញមន្រ្តីស្ថានទូតរុស្ស៉ីម្នាក់ ក្រោយលើកឡើងជាថ្មីអំពីបញ្ហាបំពានដែនអាកាស។ អ្នកបើកបរយន្តហោះចម្បាំង F-16 របស់រូម៉ានី បានបាញ់ទម្លាក់ដ្រូន ៣គ្រឿងក្នុងរយៈពេល ៣ថ្ងៃជាប់ៗគ្នា ចាប់តាំងពីថ្ងៃសុក្រសប្តាហ៍មុន។ កាលពីខែឧសភា រូម៉ានី និយាយថាដ្រូនរុស្ស៉ីមួយគ្រឿង បានធ្លាក់ចូលក្នុងអគារអាផាតមិនមួយកន្លែង អំឡុងការវាយប្រហារលើអ៊ុយក្រែន ដោយបណ្តាលឱ្យស្ត្រីម្នាក់ និងកុមារម្នាក់រងរបួស៕

ព័ត៌មានទាក់ទង