រាជធានីភ្នំពេញ៖នៅក្នុងដំណើរការនៃកម្មវិធី អ្នកចូលរួមទាំងអស់បានចូលរួមយ៉ាងសកម្មក្នុងការសំណេះសំណាល ដែលផ្តោតលើប្រធានបទសំខាន់ៗ ដូចជា៖ គោលការណ៍គ្រប់គ្រងហិរញ្ញវត្ថុផ្ទាល់ខ្លួន ការសន្សំ ការបង្កើតអាជីវកម្ម និងវិធីសាស្ត្រកសាងទ្រព្យសម្បត្តិ។ លើសពីនេះ អ្នកចូលរួមក៏ទទួលបានឱកាសដ៏ល្អក្នុងការក្រសោបយកចំណេះដឹង និងបទពិសោធន៍ស៊ីជម្រៅពីវាគ្មិនកិត្តិយសចំនួន ២ រូប គឺ លោក Sovannprina Kiet និង អ្នកនាង Socheata Sueng ដែលជាអ្នកជំនាញ និងមានបទពិសោធន៍យ៉ាងសម្បូរបែបក្នុងវិស័យសហគ្រាស ការវិនិយោគ និងការបង្កើតមាតិកាឌីជីថល។ កាលពីថ្ងៃទី១៧ ខែកក្កដា ឆ្នាំ២០២៦ កន្លងទៅនេះ ក្លឹបសិក្សាធនាគារ និងហិរញ្ញវត្ថុ នៃសាកលវិទ្យាល័យអន្តរជាតិ ផារ៉ាហ្គន (PBAFC) បានររៀបចំកម្មវិធី BAF Forum 3.0 ក្រោមប្រធានបទ «កសាងទ្រព្យសម្បត្តិរបស់អ្នកក្នុងវ័យ ២០ ឆ្នាំ (Building Wealth in Your 20s)» នៅក្នុងបរិវេណសាកលវិទ្យាល័យផ្ទាល់ ដោយទទួលបានលទ្ធផលយ៉ាងផ្លែផ្កា និងការគាំទ្រយ៉ាងកុះករ។ កម្មវិធីនេះរៀបចំឡើងក្នុងគោលបំណងលើកកម្ពស់ចំណេះដឹងផ្នែកហិរញ្ញវត្ថុ ព្រមទាំងជំរុញឱ្យយុវជនកម្ពុជាចេះរៀបចំផែនការហិរញ្ញវត្ថុប្រកបដោយប្រសិទ្ធភាពសម្រាប់អនាគត។ តាមរយៈការចែករំលែកបទពិសោធន៍ជាក់ស្តែង វាគ្មិនទាំងពីរបានផ្តល់នូវទស្សនៈ និងគន្លឹះសំខាន់ៗក្នុងការគ្រប់គ្រងហិរញ្ញវត្ថុ ព្រមទាំងវិធីសាស្ត្របង្កើតឱកាសអភិវឌ្ឍអាជីពក្នុងយុគសម័យឌីជីថល ធ្វើឱ្យអ្នកចូលរួមទទួលបានការបំផុសគំនិត និងភាពជឿជាក់ក្នុងការរៀបចំអនាគតរបស់ខ្លួន។ មិនតែប៉ុណ្ណោះ វេទិកានេះក៏បានបើកឱកាសឱ្យសិស្ស-និស្សិតមកពីគ្រឹះស្ថានអប់រំផ្សេងៗ បានសួរសំណួរ ផ្លាស់ប្តូរទស្សនៈ និងបង្កើតបណ្តាញទំនាក់ទំនងផ្ទាល់ជាមួយអ្នកជំនាញផងដែរ។ គួរបញ្ជាក់ថា កម្មវិធី BAF Forum ត្រូវបានរៀបចំឡើងជាលើកទី៣ ហើយ ដោយនៅតែបន្តបេសកកម្មយ៉ាងមុតមាំក្នុងការផ្សារភ្ជាប់ចំណេះដឹងក្នុងថ្នាក់រៀនទៅនឹងការអនុវត្តជាក់ស្តែង និងលើកកម្ពស់វប្បធម៌នៃការសិក្សាអំពីហិរញ្ញវត្ថុក្នុងចំណោមយុវជន។ ភាពជោគជ័យនៃការរៀបចំកម្មវិធី BAF Forum 3.0 នេះ អាចសម្រេចទៅបានដោយសារមានការឧបត្ថម្ភគាំទ្រយ៉ាងពេញទំហឹងពី ដេប៉ាតឺម៉ង់ធនាគារ និងហិរញ្ញវត្ថុ នៃសាកលវិទ្យាល័យអន្តរជាតិ ផារ៉ាហ្គន ក្នុងនាមជាអ្នកឧបត្ថម្ភថវិកា (Gold Sponsor) ព្រមទាំងមានការចូលរួមឧបត្ថម្ភជាសម្ភារ (In-kind Sponsors) ពីសំណាក់ Bakeology Phnom Penh និង THE COLLECTOR LOUNGE។ កម្មវិធី BAF Forum 3.0 បានបញ្ចប់ទៅដោយបន្សល់ទុកនូវទស្សនៈវិជ្ជមាន និងការកោតសរសើរជាច្រើនពីសំណាក់អ្នកចូលរួម។ ក្លឹបសិក្សាធនាគារ និងហិរញ្ញវត្ថុ (PBAFC) សង្ឃឹមយ៉ាងមុតមាំថា កម្មវិធីនេះនឹងក្លាយជាផ្នែកមួយយ៉ាងសំខាន់ក្នុងការពង្រឹងចំណេះដឹង និងជំនាញគ្រប់គ្រងហិរញ្ញវត្ថុដល់យុវជនកម្ពុជា ដើម្បីកសាងអនាគតមួយប្រកបដោយស្ថិរភាព និងភាពជោគជ័យ៕⁩

ព័ត៌មានទាក់ទង