ក្រុមនៅអឺរ៉ុបដូចគ្នា ន័រវែសពុំដែលបានឡើងមកលេង World Cup ម្តងណាឡើយ គិតចាប់តាំងពី World Cup 1998 នៅប្រទេសបារាំង ក៏ប៉ុន្តែពួកគេបានឈានដល់វគ្គ ៨ក្រុមលើកនេះជាលើកដំបូង ក្នុងនាមក្រុមឈរនៅចំណាត់ថ្នាក់លេខ២ ចេញពីពូល I ដោយបានទម្លាក់កូដឌីវ័រ និងសាំបាប្រេស៊ីលនៃវគ្គចាញ់-ធ្លាក់។ ខ្សែប្រយុទ្ធមុតស្រួចរបស់ន័រវែស Erling Haaland បានថ្លែងក្នុងសន្និសីទថា រាល់សម្ពាធទាំងឡាយគឺបាន ធ្លាក់ទៅលើគូប្រជែងតោកំណាចអង់គ្លេស ដែលត្រូវប៉ះគ្នាក្នុងវគ្គ ៨ក្រុម World Cup 2026 នាថ្ងៃសៅរ៍ស្អែកនេះ។ នេះបើយោងតាមការចេញផ្សាយដោយ BBC។ ចំណែកឯអង់គ្លេសវិញ ក៏បានឈានដល់យ៉ាងហោចណាស់វគ្គ ៨ក្រុមនៃ World Cup ៣សម័យកាលចុងក្រោយនេះដែរ និងពុំដែលឡើងដល់ផ្តាច់ព្រ័ត្រម្តងណាទៀតដែរ គិតចាប់តាំងពីឈ្នះជើងឯកកាលឆ្នាំ១៩៦៦ មក។ នៅពេលមានអ្នកកាសែតសួរថា តើសម្ពាធទាំងឡាយពិតជាធ្លាក់ទៅលើគូប្រជែងអង់គ្លេសមែនទេ? ខ្សែប្រយុទ្ធនៃក្លិប Manchester City រូបនេះបានឆ្លើយថា «បាទ, ពិតបា្រកដណាស់។ ខ្ញុំគិតថា អង់គ្លេសនឹងហាលអាវត្រឹមវគ្គនេះ។ គ្រប់គ្នាគួរតែចាប់អារម្មណ៍ទៅលើអង់គ្លេសប្រកបភាពជឿជាក់ ដ្បិតពួកគេកំពុងមានភាពរីកចម្រើនផងដែរ»។ គួរបញ្ជាក់ផងថា Haaland វ័យ ២៥ឆ្នាំ តែងតែរកបានគ្រាប់បាល់ជានិច្ច ក្នុងចំណោម ១៤ប្រកួតចុងក្រោយរបស់លោក ជាមួយន័រវែស និងត្រៀមតតាំងទល់នឹងក្រុមទឹកដីកំណើតដែលលោកបានកើតនៅទីក្រុង Leeds នៃប្រទេសអង់គ្លេស។ បច្ចុប្បន្ន Haaland រកបាន ៧គ្រាប់ និងចាញ់ប្រៀប Lionel Messi និង Kylian Mbappe តែ ១គ្រាប់ប៉ុណ្ណោះ ក្នុងចំណោម ៥ប្រកួតកន្លងមកជាមួយន័រវែស ក្នុងការប្រជែងស្បែកជើងមាស Golden Boot នៅ World Cup 2026 ដែលនឹងឈានចូលផ្តាច់ព្រ័ត្រនារាត្រីថ្ងៃអាទិត្យ ទី១៩ ខែកក្កដាសប្តាហ៍ក្រោយ៕

ព័ត៌មានទាក់ទង