បារាំងដែលស្ថិតនៅតំបន់អឺរ៉ុប បានបំបាក់ម៉ារ៉ុក ២ទល់នឹង០ កាលជួបគ្នាចុងក្រោយតែ ១លើកនៅ World Cup 2022 ដែលមានកាតាធ្វើម្ចាស់ផ្ទះ ជាពេលក្រុមមាន់គកបានត្រឹមរងជើងឯក ហើយម៉ារ៉ុកជាប់លេខ៤ ក្រោយចាញ់ក្រូអាតនៃការប្រកួតយកចំណាត់ថ្នាក់លេខ៣។ មាន់គកបារាំង អតីតជើងឯក World Cup ២សម័យកាលឆ្នាំ១៩៩៨ និងឆ្នាំ២០១៨ ធ្លាប់បានយកឈ្នះ ក្រុមមកពីតំបន់អាហ្រ្វិក ម៉ារ៉ុកដល់ទៅ ៤លើកពីប្រវត្តិធ្លាប់ជួបគ្នាសរុប ៦លើកកន្លងមក មុនពើបប្រទះគ្នាជាថ្មីនាម៉ោង ៣ទៀបភ្លឺឈានចូលព្រឹកថ្ងៃសុក្រ ទី១០ ខែកក្កដានៃវគ្គ ៨ក្រុមនៅ FIFA World Cup 2026 (ម៉ោងនៅកម្ពុជា)។ បច្ចុប្បន្នបារាំង ស្ថិតនៅលេខ១ ក្នុងតារាងចំណាត់ថ្នាក់ពិភពលោក FIFA World Ranking គ្រាដែលគូប្រជែងម៉ារ៉ុក ស្ថិតនៅលេខ៦ ដែលត្រូវប្រឈមមុខដាក់គ្នារាត្រីនេះ ដើម្បីប្រជែងយកកៅអីឡើងវគ្គពាក់កណ្តាលផ្តាច់ព្រ័ត្រ World Cup លើកទី២៣ ដែលរៀបចំនៅសហរដ្ឋអាមេរិក មិចស៊ិក និងកាណាដា ធ្វើម្ចាស់ផ្ទះរួមគ្នា។ បារាំង ជាក្រុមលេខ១ ចេញពីពូល I មុនពេលបំបាក់ក្រុមនៅអឹរ៉ុបដូចគ្នា ស៊ុយអែត ៤-០ ក្នុងវគ្គ ៣២ក្រុម និងទម្លាក់ប៉ារ៉ាហ្គាយ ១-០ ដោយបាល់ប៉េណាល់ទី នៅពេលម៉ារ៉ុក បានទម្លាក់ហូឡង់ដោយបាល់ប៉េណាល់ទីកាត់សេចក្តី ៣-២ ក្រោយស្មើគ្នា ១-១ ក្នុងម៉ោងធម្មតា ៩០នាទី និងថែម ១៥នាទី ២ដងនៃវគ្គ ៣២ក្រុម មុនពេលទម្លាក់សហម្ចាស់ផ្ទះកាណាដា ៣-០ ពីក្នុងវគ្គ ១៦ក្រុម។ ខាងក្រោមជាលទ្ធផលនៃការជួបគ្នាទាំង ៦លើកកន្លងមករវាងក្រុមទាំងពីរ៖ បារាំង ២-១ ម៉ារ៉ុក ឆ្នាំ១៩៨៨ បារាំង ២-២ ម៉ារ៉ុក (ប៉េណាល់ទី ៥-៦) ឆ្នាំ១៩៩៨ បារាំង ១-០ ម៉ារ៉ុក ឆ្នាំ១៩៩៩ បារាំង ៥-១ ម៉ារ៉ុក ឆ្នាំ២០០០ បារាំង ២-២ ម៉ារ៉ុក ឆ្នាំ២០០៧ បារាំង ២-០ ម៉ារ៉ុក ឆ្នាំ២០២២៕

ព័ត៌មានទាក់ទង