ប្រភពនយោបាយអ៊ីស្រាអែលបានបញ្ជាក់ថា លោក នេតាន់យ៉ាហ៊ូ បានសង្កត់ធ្ងន់ពីជំហររក្សាសេរីភាពសកម្មភាពយោធារបស់ខ្លួននៅគ្រប់សមរភូមិ រួមទាំងនៅលីបង់ផងដែរ ហើយលោកប្រធានាធិបតី ត្រាំ ក៏បានបង្ហាញការគាំទ្រចំពោះគោលការណ៍នេះ។ ជំហរដ៏រឹងត្អឹងនេះ ឆ្លុះបញ្ចាំងពីការព្រួយបារម្ភរបស់មន្ត្រីនយោបាយអ៊ីស្រាអែលជាន់ខ្ពស់ដូចជា លោក បេននី ហ្កង់ (Benny Gantz) ដែលបានព្រមានថា ការយល់ព្រមលើបទឈប់បាញ់នៅលីបង់ ជាផ្នែកមួយនៃកិច្ចព្រមព្រៀងជាមួយអ៊ីរ៉ង់ គឺជាកំហុសយុទ្ធសាស្ត្រដ៏ធំមួយ ខណៈកងទ័ពអ៊ីស្រាអែលកំពុងបន្តប្រតិបត្តិការប្រយុទ្ធជាមួយក្រុមហេសបូឡានៅទីនោះ។ នាយករដ្ឋមន្ត្រីអ៊ីស្រាអែល លោក បេនចាមីន នេតាន់យ៉ាហ៊ូ បានប្រាប់ប្រធានាធិបតីអាមេរិក លោក ដូណាល់ ត្រាំ តាមរយៈការសន្ទនាតាមទូរស័ព្ទកាលពីថ្ងៃសៅរ៍ថា អ៊ីស្រាអែលនឹងបន្តរក្សាសេរីភាពក្នុងការចាត់វិធានការយោធាប្រឆាំងនឹងការគំរាមកំហែងនៅក្នុងប្រទេសលីបង់។ ការសន្ទនានេះធ្វើឡើងស្របពេលដែលទីក្រុងវ៉ាស៊ីនតោន និងអ៊ីរ៉ង់ កំពុងខិតជិតសម្រេចបាននូវកិច្ចព្រមព្រៀងសន្តិភាព។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ ទន្ទឹមនឹងនេះ លោក ត្រាំ បានប្រកាសថា សហរដ្ឋអាមេរិក និងអ៊ីរ៉ង់បានចរចាស្ទើរតែរួចរាល់ហើយ លើអនុស្សរណៈនៃការយោគយល់គ្នា ដែលរំពឹងថានឹងជួយបើកដំណើរការច្រកសមុទ្រហ័រមូសឡើងវិញ បន្ទាប់ពីវាត្រូវបានបិទខ្ទប់តាំងពីខែកុម្ភៈមក។ យោងតាមទីភ្នាក់ងារសារព័ត៌មាន Fars សេចក្តីព្រាងនេះតម្រូវឱ្យអាមេរិក និងសម្ព័ន្ធមិត្តបញ្ឈប់ការវាយប្រហារលើអ៊ីរ៉ង់ និងសម្ព័ន្ធមិត្តរបស់ខ្លួន ជាថ្នូរនឹងការដែលអ៊ីរ៉ង់សន្យាមិនបើកការវាយប្រហារមុន។ ទោះបីជាភាគីអាមេរិក និងអ៊ីរ៉ង់ ហាក់កំពុងខិតជិតរកកិច្ចព្រមព្រៀងក្តី ប៉ុន្តែប្រភពពីអ៊ីស្រាអែលបានអះអាងថា លោក ត្រាំ នៅតែប្រកាន់ជំហរដាច់ខាតក្នុងការទាមទារឱ្យអ៊ីរ៉ង់រុះរើកម្មវិធីនុយក្លេអ៊ែរ និងបញ្ជូនសារធាតុអ៊ុយរ៉ាញ៉ូមចម្រាញ់ទាំងអស់ចេញពីប្រទេស ដោយលោកនឹងមិនចុះហត្ថលេខាជាដាច់ខាត ប្រសិនបើលក្ខខណ្ឌនេះមិនត្រូវបានបំពេញ៕

ព័ត៌មានទាក់ទង