ខេត្តកែប៖ពិធីសំណេះសំណាលនេះ មានការអញ្ជើញចូលរួមពីសមាជិកព្រឹទ្ធសភា រដ្ឋសភា ប្រធាន អនុប្រធានក្រុមការងារថ្នាក់ជាតិចុះជួយខេត្តកំពត និងខេត្តកែប សមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងថ្នាក់ដឹកនាំមន្ទីរ អង្គភាពនានាជុំវិញខេត្តកំពត និងខេត្តកែបសរុបជាង ១ពាន់នាក់។ នៅព្រឹកថ្ងៃសៅរ៍ ទី៩ ខែឧសភា ឆ្នាំ២០២៦នេះ សម្តេចតេជោ ហ៊ុន សែន ប្រមុខ​រដ្ឋស្តីទី និង​ជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ អញ្ជើញជួបសំណេះសំណាល​ជាមួយ​​ក្រុម​​ប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានា​ជុំវិញ​ខេត្តកំពត និងខេត្តកែប។ សម្តេចតេជោ ហ៊ុន សែន បានហៅការអញ្ជើញចុះជួបសំណេះសំណាលជាមួយ ក្រុម ប្រឹក្សា រាជធានី ខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានានេះ ជា ដំណើរឆ្ពោះ ទៅកាន់មូលដ្ឋាន។ ដំណើរឆ្ពោះទៅកាន់មូលដ្ឋាន បានចាប់ផ្តើម កាលពីថ្ងៃ ទី២៥ ខែមេសា ឆ្នាំ២០២៦។ ខេត្តចំនួន៤ហើយ ដែលសម្តេចតេជោ ហ៊ុន សែន បាន​អញ្ជើញ​ជួបសំណេះសំណាលរួមមាន៖ ខេត្តកំពង់ចាម ត្បូងឃ្មុំ កំពង់ស្ពឺ និងតាកែវ។ កម្មវិធីជួបសំណេះសំណាលនេះ គឺជាវេលាដ៏មានសារៈសំខាន់មួយសម្រាប់សម្តេចតេជោ ហ៊ុន សែន ក្នុងការក្រើនរំលឹក និងជំរុញដល់មន្ត្រីនៅមូលដ្ឋានឱ្យបង្កើនការយកចិត្តទុក​ដាក់ទៅលើកិច្ចការជាដែនសមត្ថកិច្ចរបស់ខ្លួន ជាពិសេសការផ្តល់សេវាទាំងឡាយជូន ដល់ប្រជាពលរដ្ឋ ក៏ដូចជាការដោះស្រាយបញ្ហាទាំងឡាយដែលជាក្តីកង្វល់របស់ប្រជា​ពល​​រដ្ឋ។ ក្រៅពីការជំរុញយកចិត្តទុកដាក់លើការផ្តល់សេវាហើយនោះ សម្តេចតេជោ ហ៊ុន សែន ក៏លើកឡើងពីបញ្ហាសន្តិសុខសណ្តាប់ធ្នាប់ ការប្រយុទ្ធប្រឆាំងបទល្មើសនានា កិច្ចការ ការពារធនធានធម្មជាតិ និងការងារគ្រប់គ្រងរដ្ឋបាលនៅមូលដ្ឋាន។ យោងតាម Fresh AI បានឱ្យដឹងថា ខេត្តកែប ជាខេត្តដែលមានតូចជាងគេនៅកម្ពុជា ស្ថិតនៅភាគនិរតី។ ខេត្តកែប ពីមុន​មាន​ឈ្មោះថា ក្រុងកែប-បូកគោ ដែលបង្កើតឡើងនៅឆ្នាំ១៩៥៣ ដោយស្នាព្រះហស្ថ សម្តេចព្រះបរមរតនកោដ្ឋ ព្រះនរោត្ដម សីហនុ បន្ទាប់ពីទទួលបានឯករាជ្យ ស្ថិតក្នុង​សម័យ​សង្គមរាស្ត្រនិយម។ ក្រោយឆ្នាំ១៩៧៩ ខេត្តកែប គ្រាន់តែជាឃុំមួយឈ្មោះថា «ឃុំកែប» ដែលស្ថិតនៅ​ចំណុះ​​ស្រុកកំពត ខេត្តកំពត។ លុះដល់ថ្ងៃទី១១ ខែសីហា ឆ្នាំ១៩៩២ រដ្ឋសភានៃរដ្ឋ​កម្ពុជា បានអនុម័តច្បាប់ស្តីពីការបង្កើតក្រុងកែបឡើងវិញ និងត្រូវបានប្តូរឈ្មោះជា «ខេត្តកែប» នៅថ្ងៃទី២២ ខែធ្នូ ឆ្នាំ២០០៨ មកដល់បច្ចុប្បន្ននេះ មានអភិបាលនៃ​គណៈ​អភិបាលខេត្តចំនួន ១០រូប។ ខេត្តកែប មានចម្ងាយប្រមាណ ១៧៥គីឡូម៉ែត្រ ពីរាជធានីភ្នំពេញ។ ខេត្តមានព្រំប្រទ​ល់​ខាងកើត ខាងជើង ខាងលិច ជាប់នឹងខេត្តកំពត និងខាងត្បូងជាប់តំបន់ទឹក​ប្រវត្តិ​សាស្ត្រ​កម្ពុជា-វៀតណាម។ ខេត្តកែប មានទំហំផ្ទៃដីគោកសរុប ១៨៧,២៤គីឡូម៉ែត្រក្រឡា ព្រមទាំងមានផ្ទៃសមុទ្រ និងមានកោះចំនួន១៣។ រដ្ឋបាលដែនដីចែកចេញជាក្រុង១ ស្រុក១ មាន ៥ឃុំ/សង្កាត់ និង១៨ភូមិ។ ខេត្តជាប់ឆ្នេរសមុទ្រដ៏ល្បាញល្បីមួយនេះ មានប្រជាពលរដ្ឋសរុប ១១,១៧៤គ្រួសារ ប្រជាពលរដ្ឋសរុបចំនួន ៤៦,៥៦១នាក់ ស្រីចំនួន ២៣,៦៩៦នាក់។ មុខរបរចម្បងរបស់​ប្រជាពលរដ្ឋ គឺការធ្វើស្រែចំការ នេសាទសមុទ្រ ផលិតអំបិល និងអាជីវកម្ម​ទេស​ចរណ៍។ ដោយឡែកខេត្តកំពត មានផ្ទៃដីសរុបចំនួន ៤.៨៧៣,២គីឡូម៉ែត្រក្រឡា ជាខេត្តជាប់​មាត់​សមុទ្រ មានព្រំប្រទល់ខាងជើងជាប់នឹងខេត្តកំពង់ស្ពឺ និងខេត្តព្រះសីហនុ ខាងកើត​ជាប់​នឹងខេត្តតាកែវ ខាងត្បូងជាប់នឹងខេត្តកែបនិងប្រទេសវៀតណាម ខាងលិច​ជាប់នឹង​ខេត្តព្រះសីហនុ និងឈូងសមុទ្រថៃ។ ខេត្តកំពត មានឆ្នេរសមុទ្រប្រវែង ៦៦,៥គីឡូម៉ែត្រ​។ ខេត្តកំពត មានព្រំដែនគោកជាប់ជាមួយខេត្តអានយ៉ាង ប្រទេសវៀតណាម មាន ប្រវែងប្រមាណ ៤២,៣គីឡូម៉ែត្រ។ ខេត្តកំពត មានសក្តានុពលធនធានធម្មជាតិ សម្រាប់ការអភិវឌ្ឍពហុវិស័យដូចជា វិស័យកសិកម្ម, ពាណិជ្ជកម្ម, ឧស្សាហកម្ម និងទេសចរណ៍។ មានឆ្នេរសមុទ្រប្រវែង ៦៦,៥គីឡូម៉ែត្រ, ធនធានសមុទ្រសម្បូរបែប, ឧទ្យានជាតិ ព្រះមុន្នីវង្សបូកគោ, កំពង់ផែធំៗ ចំនួន៥កន្លែង, រោងចក្រស៊ីម៉ងត៍ ចំនួន៤កន្លែង, វារីអគ្គិសនីផលិតថាមពលបាន ចំនួន​១៩៤,១មេកាវ៉ាត់, ព្រមទាំងមានប្រព័ន្ធគមនាគមន៍តភ្ជាប់គ្នាជាច្រើនដូចជា ផ្លូវជាតិលេខ​៣, លេខ៤១, លេខ៤៣, លេខ៣១, លេខ៣២, លេខ៣៣ និងផ្លូវរថភ្លើងមួយខ្សែត​ភ្ជាប់​ពីភ្នំពេញ មកកំពត និងទៅខេត្តព្រះសីហនុ។ ខេត្តកំពត បែងចែកជា ៩ក្រុង-ស្រុក, ៩៣ឃុំ-សង្កាត់ និង ៤៩១ភូមិ និងមានប្រជាពល​រដ្ឋ​សរុប ៧២៣ ៩៥៤ នាក់ (ស្រី ៣៧៣ ២៥១ នាក់) ស្មើនឹង ១៨៤ ៦៤៨គ្រួសារ។ ប្រជា​ជនក្នុងខេត្តកំពត ប្រកបរបរក្នុងផ្នែកផ្សេងៗមានដូចជា មុខរបរចម្បង​ក្នុងផ្នែក​កសិ​កម្មមានចំនួន ៧២,៤ភាគរយ, បម្រើការងារចម្បងផ្នែកសិប្បកម្មមានចំនួន ០.៥ភាគរយ និងបម្រើការងារចម្បងក្នុងផ្នែកសេវាកម្មមានចំនួន ២៧.១ភាគរយ។ ខេត្តកំពតឆ្នាំ២០២៥ មានទំហំសេដ្ឋកិច្ចប្រមាណ ១ ៦១២,៤លានដុល្លារ មានកំណើន​សេដ្ឋ​កិច្ច ៩ភាគរយ ធៀបនឹងឆ្នាំ២០២៤ និងចំណូលសម្រាប់មនុស្សម្នាក់ ២១២៦,៤ដុល្លារ។ កំណើនសេដ្ឋកិច្ចតាមវិស័យបីធំៗមាន៖ កសិកម្ម មានប្រមាណ ៨៨៥,៩ លានដុល្លារ, ឧស្សាហកម្ម មានប្រមាណ ៣០៥,៥លានដុល្លារ និងសេវាកម្ម មានប្រមាណ ៤១២,០លានដុល្លារ៕

ព័ត៌មានទាក់ទង