លោក កែវ សុភ័ក្រ្ដ បានឱ្យដឹងថា ខ្ជាយខ្មៅ ឬ ប្រទាលថ្លើមឆ្កែ គឺជារុក្ខជាតិដែលនៅលើភ្នំគូលែនតាំងពីសម័យបុរាណ ហើយរុក្ខជាតិមួយបែបនេះ គឺជារុក្ខជាតិដែលយើងអាចយកទៅដាំនៅដីរាបបាន ប៉ុន្ដែមិនមានប្រសិទ្ធភាព ហើយមើមរបស់ ខ្ជាយខ្មៅ ដូចជា ខ្ញី បើនិយាយអំពីថ្នាំរបស់វាមានតិចតួចបំផុត ទាល់តែដាំរយៈកម្ពស់ចាប់ពី៤០០ម៉ែត្រ ៥០០ម៉ែត្រ បានវាមានបំបែកធាតុសកម្មរបស់វា ទើបអាចបំបែកធាតុឱសថរបស់វា ហើយរុក្ខជាតិនៅលើភ្នំគូលែន ដែលដាំដុះគឺជាការធ្វើកសិកម្ម បែបកសិរុក្ខកម្ម។ លោក កែវ សុភ័ក្រ្ដ ជាមន្រ្ដី Agrisud បានលើកឡើងថា ខ្ជាយខ្មៅ ជាឱសថជួយសុខភាព និងមានតម្លៃខ្ពស់ ស្របពេលទីផ្សារកាន់តែល្អប្រសើរផងដែរ។ ការលើកឡើងបែបនេះរបស់ លោក កែវ សុភ័ក្រ្ដ បានធ្វើឡើងនៅក្នុងដំណើរទស្សនកិច្ចអ្នកសារព័ត៌មានចំនួន ២៥ស្ថាប័ន ចុះទៅបំពេញបេសកម្មសារព័ត៌មានដើម្បី ផ្សព្វផ្សាយនៅក្នុងការអនុវត្ដកសិអេកូឡូស៊ីសម្រាប់អ្នកសារព័ត៌មាន នៅខេត្តសៀមរាប និងកំពង់ធំ ក្រោមការគាំទ្រថវិកាពីអង្គការ Uni4Coop និង កម្មវិធីលើកកម្ពស់កសិអេកូឡូស៊ី (APP) នៃអង្គការហ្គ្រេត ដែលមានរយៈពេល៣ថ្ងៃ ចាប់ពីថ្ងៃទី២៤ ដល់ ២៦ ខែមេសា ឆ្នាំ២០២៦នេះ។ លោកបានបន្ដថា កសិរុក្ខកម្ម គឺជាការធ្វើកសិកម្មដែលពឹងផ្អែកជាមួយធម្មជាតិ និងរុក្ខជាតិ ដែលអាស្រ័យគ្នាទៅវិញទៅមក រុក្ខជាតិវាអាស្រ័យទៅលើរុក្ខជាតិដែលនៅជុំវិញខ្លួន ដែលអាចសំយោគបរិយាកាសរបស់វា បានត្រឹមត្រូវ រក្សាពន្លឺ ហើយស្លឹករុក្ខជាតិទាំងអស់ក៏អាចក្លាយទៅជាជីផងដែរ។ រីឯលោកស្រី ហេង ចាន់ណាក់ ជាអនុប្រធានក្រុមផលិតគ្រឿងទេសស មូតខ្នងភ្នំគូលែន នៃសមាគមអ្នកដាំបន្លែសុវត្ថិភាពសៀមរាប បានឱ្យដឹងថា ក្នុងមួយរដូវ គឺបានប្រមូលទិញពីកសិករចំនួន១តោន សម្រាប់តម្លៃ ១ម៉ឺន៤ពាន់រៀល ក្នុងមួយគីឡូ។ សម្រាប់ការដាំខ្ជាយខ្មៅ មានរយៈ៦ខែ ទៅ៨ខែទើបទទួលបានផល។ អត្ថប្រយោជន៍ខ្ជាយខ្មៅ គឺជួយសម្រួលសរសៃឈាម ជួយសម្រួលអ័រម៉ូនបុរសឱ្យដើរស្រួល និងនារីជួយឱ្យមករដូវដើរស្រួលជាដើម។ ចំណែកឯ កញ្ញា ឌី ណារី ជាអ្នកសម្របសម្រួលសហគ្រាសអង្គរ DF បានបន្ដថា ផលិតផលខ្ជាយខ្មៅនេះ ដែលក្រុមផលិតបានកែច្នែ តម្រូវឱ្យវេចខ្ចប់ទៅតាមអ្វីដែលទីផ្សារត្រូវការ។ ហើយមានបិទស្លាកសញ្ញាទៅតាមការណែនាំរបស់មន្ទើរឧស្សាហកម្ម ហើយកុំបានស្នើសុំការចុះបញ្ជី ច.ប.ផ ពីវិទ្យាស្ថានស្តងដារដែរ។ បច្ចប្បន្ន ផលិតផលខ្ជាយខ្មៅ ក៏បានឈានជើងចូលទីផ្សារ ហើយទីផ្សារដែលចូលបានច្រើនជាងគេ នៅខេត្ដសៀមរាប ក៏មានការលក់នៅតាមហាងផ្សេងៗ និងលក់តាមប្រព័ន្ធអនឡាញផងដែរ៕

ព័ត៌មានទាក់ទង