លោក ត្រាំ បានបញ្ជាក់ថា បទឈប់បាញ់រយៈពេលពីរសប្តាហ៍ដែលអាចនឹងផុតកំណត់នៅសប្តាហ៍ក្រោយ អាចនឹងត្រូវពន្យារពេល ប៉ុន្តែលោកជឿជាក់ថាមិនមានភាពចាំបាច់នោះទេ ដោយសារទីក្រុងតេហេរ៉ង់ចង់បានកិច្ចព្រមព្រៀងនេះខ្លាំងណាស់។ ប្រធានាធិបតីអាមេរិក លោក ដូណាល់ ត្រាំ បានអះអាងថា កិច្ចព្រមព្រៀងដើម្បីបញ្ចប់សង្គ្រាមនៅប្រទេសអ៊ីរ៉ង់អាចនឹងសម្រេចបានក្នុងពេលឆាប់ៗនេះ ទោះបីជាពេលវេលាជាក់លាក់នៅមិនទាន់ច្បាស់លាស់ក៏ដោយ ខណៈដែលក្រុមសម្ព័ន្ធមិត្តរបស់សហរដ្ឋអាមេរិកកំពុងជួបប្រជុំគ្នានៅថ្ងៃសុក្រ ដើម្បីពិភាក្សាពីការបើកដំណើរការច្រកសមុទ្រហ័រមូសឡើងវិញ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ ប្រធានាធិបតីអាមេរិករូបនេះ បានប្រាប់ក្រុមអ្នកសារព័ត៌មានថា អាមេរិកកំពុងខិតជិតដល់ការសម្រេចបានកិច្ចព្រមព្រៀងជាមួយអ៊ីរ៉ង់ ហើយប្រសិនបើកិច្ចព្រមព្រៀងនេះត្រូវបានចុះហត្ថលេខានៅរដ្ឋធានីអ៊ីស្លាម៉ាបាដ នៃប្រទេសប៉ាគីស្ថាន លោកក៏អាចនឹងធ្វើដំណើរទៅទីនោះផងដែរ។ ទោះជាយ៉ាងណា ប្រភពពីភាគីអ៊ីរ៉ង់បានប្រាប់ Reuters ថា នៅតែមានបញ្ហាចម្រូងចម្រាសមួយចំនួនដែលត្រូវដោះស្រាយ មុនពេលឈានដល់កិច្ចព្រមព្រៀងបឋម។ គួរបញ្ជាក់ថា ជុំវិញបញ្ហានេះ វិធានការសន្តិសុខនៅរដ្ឋធានីអ៊ីស្លាម៉ាបាដ ដែលជាទីតាំងរៀបចំកិច្ចចរចាកាលពីចុងសប្តាហ៍មុន ត្រូវបានពង្រឹងឡើងវិញ ដោយមានវត្តមានកងទ័ពដាក់ពង្រាយនៅតាមដងផ្លូវនាថ្ងៃសុក្រនេះ៕

ព័ត៌មានទាក់ទង