លោក Michael Vance ដែលជាឧបការីរដ្ឋមន្ត្រីការបរទេសអាមេរិកទទួលបន្ទុកផ្នែកស៉ើបការណ៍សម្ងាត់ និងការស្រាវជ្រាវ បានដើរតួនាទីសំខាន់ក្នុងការធ្វើទំនាក់ទំនងឡើងវិញនេះ។ កិច្ចប្រឹងប្រែងផ្តោតសំខាន់លើការបិទទីតាំងឆបោកតាមអ៉ីនធឺណេត ដែលកំណត់គោលដៅលើជនជាតិអាមេរិក ប៉ុន្តែវាក៏អាចឈានទៅរកកិច្ចសហប្រតិបត្តិការទូលំទូលាយ រួមទាំងបញ្ហាទាក់ទងនឹងប្រភពរ៉ែកម្រ នៅក្នុងប្រទេសមីយ៉ាន់ម៉ា។ នេះបើតាមការបញ្ជាក់ពីមន្ត្រី និងអតីតមន្ត្រីអាមេរិក ៧រូប ព្រមទាំងបុគ្គលផ្សេងទៀតដែលដឹងអំពីដំណើរការ។ រដ្ឋបាលប្រធានាធិបតី ដូណាល់ ត្រាំ បានចាប់ផ្តើមការចរចាផ្ទាល់ ជាមួយរដ្ឋាភិបាលដំឡើងដោយយោធាមីយ៉ាន់ម៉ា ដែលនេះគឺជាការផ្លាស់ប្តូរធំមួយនៅក្នុងគោលនយោបាយរបស់ទីក្រុងវ៉ាស៊ីនតោន ដែលធ្លាប់តែប្រឹងប្រែងដាក់ប្រទេសនេះនៅឯកោពីអន្តរជាតិ បន្ទាប់ពីព្រឹត្តិការណ៍រដ្ឋប្រហារឆ្នាំ២០២១។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី៩ ខែតុលា ឆ្នាំ២០២៦។ ប្រភពដដែលឱ្យដឹងថា លោក Michael Vance បានជួបពិភាក្សាជាមួយមេដឹកនាំមីយ៉ាន់ម៉ា លោក Min Aung Hlaing នៅរដ្ឋធានី Naypyidaw កាលពីថ្ងៃទី១៥ និងទី១៦ ខែកញ្ញា។ ជំនួបនោះមានគោលបំណងស្វែងរកការដោះលែងអ្នកជំនួញអាមេរិកម្នាក់ ឈ្មោះ Adam Castillo ប៉ុន្តែក៏បានបើកផ្លូវសម្រាប់ការបន្តកិច្ចសហប្រតិបត្តិការ ឬធ្វើទំនាក់ទំនងបន្ថែមទៀតផងដែរ។ ជំនួបដែលជាការធ្វើទំនាក់ទំនងកម្រិតខ្ពស់បំផុតចាប់តាំងពីមានរដ្ឋប្រហារនៅមីយ៉ាន់ម៉ា បានគូសបញ្ជាក់ពីការផ្លាស់ប្តូរទិសដៅ នៃគោលនយោបាយការបរទេសរបស់រដ្ឋបាលលោក ត្រាំ ពោលគឺងាកចេញពីការលើកកម្ពស់លទ្ធិប្រជាធិបតេយ្យ ទៅរកទំនាក់ទំនង ដែលផ្អែកលើផលប្រយោជន៍ជាក់ស្តែងវិញ៕

ព័ត៌មានទាក់ទង