ខេត្តបន្ទាយមានជ័យ៖ ក្រោយទទួលបានព័ត៌មាន លោកវរសេនីយ៍ត្រី តាំង សុខហេង មេបញ្ជាការមូលដ្ឋានកងរាជអាវុធហត្ថស្រុកម៉ាឡៃ បានដឹកនាំកម្លាំងចុះដល់ទីតាំងកើតហេតុ ហើយនាំខ្លួនជនសង្ស័យឈ្មោះ ធៀម វណ្ណី ហៅក្រៅ កន ភេទប្រុស អាយុ៣៤ឆ្នាំ រួមទាំងវត្ថុតាងមួយចំនួន រួមមាន ដង្កាប់ ០២ដើម, ទួណឺវីស ០៣ដើម, កន្ត្រៃ ០១ដើម និងពិល ០១ មកកាន់មូលដ្ឋានកងរាជអាវុធហត្ថស្រុក។ តាមរយៈការធ្វើតេស្តទឹកនោម ជនសង្ស័យរូបនេះក៏បានរកឃើញថាមានសារធាតុញៀនក្នុងខ្លួនផងដែរ។ កម្លាំងកងរាជអាវុធហត្ថខេត្តបន្ទាយមានជ័យ បានបញ្ជូនជនសង្ស័យម្នាក់ទៅកាន់សាលាដំបូងខេត្តបន្ទាយមានជ័យ ដើម្បីអនុវត្តតាមនីតិវិធីច្បាប់ បន្ទាប់ពីជននេះត្រូវបានឃាត់ខ្លួនពាក់ព័ន្ធនឹងករណីលួចទ្រព្យសម្បត្តិ និងប្រើប្រាស់សារធាតុញៀនខុសច្បាប់។ ជនសង្ស័យរូបនេះ ត្រូវបានចាប់ខ្លួននៅវេលាម៉ោង១៩និង០៣នាទី ថ្ងៃទី១១ ខែកក្កដា ឆ្នាំ២០២៦ នៅចំណុចក្រុមហ៊ុនប៉ាងណាគ្រី ស្ថិតក្នុងភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ បន្ទាប់ពីទទួលបានសេចក្ដីរាយការណ៍បន្ទាន់ពីលោក ថៃ ម៉េងលី អាយុ២៨ឆ្នាំ ជនជាតិខ្មែរ បច្ចុប្បន្ន ស្នាក់នៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ (តំណាងក្រុមហ៊ុនប៉ាងណាគ្រី) ។ បើតាម លោក ថៃ ម៉េងលី ករណីនេះ បង្កឡើងដោយជនសង្ស័យចំនួន ០៣នាក់។ ភ្លាមៗនោះ សន្តិសុខយាមក្រុមហ៊ុនបានឃាត់ខ្លួនជនសង្ស័យបានម្នាក់ ចំណែកបក្ខពួកពីរនាក់ទៀតបានរត់គេចខ្លួនបាត់។ ក្នុងពេលសួរនាំ ជនសង្ស័យ ធៀម វណ្ណី បានឆ្លើយសារភាពថា ខ្លួនពិតជាបានធ្វើសកម្មភាពចូលលួចសម្ភារៈនៅក្នុងក្រុមហ៊ុនពិតប្រាកដមែន។ ដោយផ្អែកលើចម្លើយសារភាព និងវត្ថុតាងជាក់ស្ដែង កម្លាំងមូលដ្ឋានកងរាជអាវុធហត្ថស្រុកបានកសាងសំណុំរឿងបញ្ជូនបន្តមកបញ្ជាការដ្ឋានកងរាជអាវុធហត្ថខេត្ត។ លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវនិងបង្ក្រាបបទល្មើសបានបញ្ជាក់ថា ប្រតិបត្តិការនេះបានធ្វើឡើងក្រោមការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត។ បច្ចុប្បន្ន ជនសង្ស័យត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្តបញ្ជូនទៅសាលាដំបូងខេត្ត ដើម្បីបន្តនីតិវិធីច្បាប់។ ចំណែកបក្ខពួកដែលបានរត់គេចខ្លួន កម្លាំងជំនាញកំពុងបន្តធ្វើការស្រាវជ្រាវដើម្បីឃាត់ខ្លួនយកមកផ្ដន្ទាទោសតាមច្បាប់៕

ព័ត៌មានទាក់ទង