តំបន់ខាងលើដែលមានប្រជាជនសរុប៣លាននាក់ គឺជាតំបន់មានមនុស្សរស់នៅច្រើនបំផុតមួយប្រចាំតំបន់ Siberia ហើយក៏ជាមជ្ឈមណ្ឌលសេដ្ឋកិច្ច និងផលិតកម្ម​ធំមួយផងដែរ។ សេចក្តីប្រកាសខាងលើនេះធ្វើឡើង បន្ទាប់ពីអ៊ុយក្រែនបានវាយប្រហារចំ រោងចក្រចម្រាញ់ប្រេងនៅតំបន់ក្បែរខាងគឺ Omsk ក្នុងសប្តាហ៍នេះ ខណៈ​វាជារោងចក្រចម្រាញ់ប្រេងធំបំផុតមួយរបស់របស់រុស្ស៉ី។ អាជ្ញាធរនៅតំបន់ Novosibirsk នៃប្រទេសរុស្ស៉ី បានទទូចឱ្យប្រជាជននៅទីនោះបំពេញការងារពីចម្ងាយ ហើយកាត់បន្ថយការធ្វើដំណើរដោយរថយន្ត ចំពោះមុខវិបត្តិខ្វះខាតប្រេងឥន្ធនៈ ដែលកាន់តែកើនឡើង ដោយសារការវាយប្រហាររបស់អ៊ុយក្រែន លើទីតាំងចម្រាញ់និងស្តុកប្រេងរបស់រុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។ យោងតាមប្រព័ន្ធផ្សព្វផ្សាយនិងមន្រ្តីក្នុងស្រុក ប្រហែល៩០ភាគរយនៃតំបន់នានារបស់រុស្ស៉ី បានជួបបញ្ហាខ្វះប្រេងឥន្ធនៈ ចាប់តាំងពីខែមិថុនា ហើយខ្លះបាននាំគ្នា​ដាក់ចេញចំណាត់ការផ្សេងៗ ដើម្បីដោះស្រាយ ដូចជាកំណត់បរិមាណសាំង ដែលអាចចាក់បានមួយលើកៗ និងហាមបម្រាមការទិញយកទៅស្តុកទុក។ នៅក្នុង​ក្រឹត្យមួយចុះកាលបរិច្ឆេទក្នុងសប្តាហ៍នេះ រដ្ឋបាលតំបន់ Novosibirsk បានណែនាំឱ្យនិយោជកដាក់ចេញគោលការណ៍ឱ្យបុគ្គលិកអាចបំពេញការងារពីចម្ងាយ និងកាត់បន្ថយ​ការប្រើប្រាស់ឥន្ធនៈ។ ទន្ទឹមគ្នា ប្រជាជនទូទៅត្រូវបានណែនាំឱ្យបន្ថយការប្រើយានយន្តផ្ទាល់ខ្លួន នៅក្នុងតំបន់ Novosibirsk ក៏ដូចជាចេញទៅតំបន់ខាងក្រៅ រហូត​ទាល់តែស្ថានការណ៍ប្រសើរឡើងវិញ។ ចំណែកនៅតំបន់ Tomsk ក្បែរខាងគ្នា អាជ្ញាធរនៅទីនោះ ក៏បានលើកទឹកចិត្តផងដែរចំពោះគោលការណ៍ធ្វើការងារពីចម្ងាយ ហើយណែនាំឱ្យមន្រ្តីពិចារណាឡើងវិញ ចំពោះគម្រោងធ្វើដំណើរធុរកិច្ច និងបើកកិច្ចប្រជុំតាមអនឡាញ ខណៈទីក្រុង Irkutsk ក៏បានណែនាំឱ្យនិយោជិត ធ្វើការពីផ្ទះដូចគ្នា។ គួរបញ្ជាក់ថា អ៊ុយក្រែនបានបង្កើនកិច្ចប្រឹងប្រែងកំណត់គោលដៅវាយប្រហារ លើហេដ្ឋារចនាសម្ព័ន្ធប្រេងនិងឧស្ម័ន នៅក្នុងប្រទេសរុស្ស៉ី ដោយប្រកាន់ជំហរថា វាជាការសងសឹកដែលស្មើភាពគ្នា សម្រាប់ការដែលរុស្ស៉ីបន្តវាយប្រហារលើហេដ្ឋារចនាសម្ព័ន្ធស៉ីវិលរបស់ខ្លួន អំឡុងសង្រ្គាមប្រមាណ៤ឆ្នាំកន្លះមកហើយនេះ។ កាលពីខែមិថុនា ប្រធានាធិបតីរុស្ស៉ី លោក វ៉្លាឌីមៀ ពូទីន បានទទួលស្គាល់បញ្ហាខ្វះខាតប្រេងឥន្ធនៈ ប៉ុន្តែអះអាងថា វាមិនធ្ងន់ធ្ងរខ្លាំងទេ ហើយបានចោទទីក្រុងកៀវថា កំពុងព្យាយាមបង្កភាពបែកបាក់ក្នុងសង្គមរុស្ស៉ី៕

ព័ត៌មានទាក់ទង