ខេត្តស្វាយរៀង៖ប្រតិបត្តិការដ៏សំខាន់នេះ បានធ្វើឡើងក្រោមការបញ្ជាផ្ទាល់ពីនាយឧត្តមសេនីយ៍ ស ថេត អគ្គស្នងការនគរបាលជាតិ, លោក ប៉េង ពោធិ៍សា អភិបាលខេត្តស្វាយរៀង និងលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្តស្វាយរៀង ព្រមទាំងក្រោមការសម្របសម្រួលពីលោក ខាំ សុផារី ព្រះរាជអាជ្ញា នៃអយ្យការអមសាលាដំបូងខេត្ត។ កម្លាំងស្នងការនគរបាលខេត្តស្វាយរៀង បានបង្ក្រាបករណីជួញដូរ រក្សាទុក កែច្នៃ និងប្រើប្រាស់ដោយខុសច្បាប់នូវសារធាតុញៀន ​ ដោយឃាត់ខ្លួនជនសង្ស័យចំនួន ៣នាក់ ជាជនជាតិចិន និងគ្រឿងញៀនជាង២គីឡូក្រាម ស្ថិតនៅភូមិបាវិតលើ សង្កាត់បាវិត ក្រុងបាវិត។ ប្រតិបត្តិការនេះក៏បានរកឃើញករណីកាន់កាប់អាវុធដោយគ្មានការអនុញ្ញាតផងដែរ។ យោងតាមសមត្ថកិច្ចនគរបាលខេត្តស្វាយរៀងបានបញ្ជាក់ថា កាលថ្ងៃ​ទី៨ ខែកក្កដា​ ឆ្នាំ​២០២៦​ លោកឧត្ដមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន​ និងលោកវរសេនីយ៍ឯក កាន កេន បានដឹកនាំកម្លាំងការិយាល័យប្រឆាំងគ្រឿងញៀនខេត្ត​ សហការជាមួយកម្លាំងនគរបាល​ នៃអធិការដ្ឋាននគរបាលក្រុងបាវិត ដឹកនាំ​ដោយលោកវរសេនីយ៍ទោ សំ​ សំអុល អធិការនគរបាលក្រុងបាវិត បានបង្ក្រាបករណីជួញដូរ រក្សាទុក​ កែច្នៃ​ ​ប្រើ​ប្រាស់​ដោយខុសច្បាប់នូវសាធាតុញៀន​ និង​កាន់​កាប់​អាវុធ​ដោយ​គ្មាន​ការ​អនុញ្ញាត​ ដោយ​ឃាត់​ខ្លួន​ជន​សង្ស័យ​ចំនួន​ ៣នាក់​ ប្រុស ជា​ជន​ជាតិ​ចិន ស្ថិត​នៅភូមិ​បាវិតលេី សង្កាត់​បាវិត​ ក្រុងបាវិត​។ ក្នុងប្រតិបត្តិការនេះ សមត្ថកិច្ចបានដកហូតវត្ថុតាងជាច្រើនរួមមាន សារធាតុញៀនសរុបមានទម្ងន់ ២គីឡូក្រាម ៦៦៦.៩៨ក្រាម, ជញ្ជីងចំនួន ០២គ្រឿង, អាវុធខ្លី ០១ដើម, ដាវ ០១ដើម, ទូរស័ព្ទដៃ ០៣គ្រឿង, ថេបប្លេត ០២គ្រឿង និងសម្ភារប្រើប្រាស់មួយចំនួនទៀត។ បច្ចុប្បន្ន ជនសង្ស័យទាំង ៣នាក់ រួមទាំងវត្ថុតាងទាំងអស់ ត្រូវបានសមត្ថកិច្ចជំនាញកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមនីតិវិធីច្បាប់។ ការបង្ក្រាបនេះបង្ហាញពីការប្តេជ្ញាចិត្តរបស់អាជ្ញាធរក្នុងការប្រយុទ្ធប្រឆាំងបទល្មើសគ្រឿងញៀន និងរក្សាសន្តិសុខសណ្តាប់ធ្នាប់សាធារណៈក្នុងខេត្ត៕

ព័ត៌មានទាក់ទង