ខេត្តពោធិ៍សាត់៖ ក្នុងពិធីដ៏មានអត្ថន័យនេះ មានការចូលរួមពី លោក ខូយ រីដា អភិបាលខេត្តពោធិ៍សាត់, លោកបណ្ឌិត ប្រាំង ជលសា អគ្គនាយកអគ្គិសនីកម្ពុជា, លោកបណ្ឌិត ទី នរិន្ទ រដ្ឋលេខាធិការប្រចាំការ ក្រសួងរ៉ែ និងថាមពល ព្រមទាំងថ្នាក់ដឹកនាំក្រុមការងារចុះជួយតាមបណ្តាស្រុក-ក្រុង-ឃុំ-សង្កាត់ យ៉ាងច្រើនកុះករ។ នាល្ងាចថ្ងៃទី១១ ខែកក្កដា ឆ្នាំ២០២៦ នៅពហុកីឡដ្ឋានសម្តេចតេជោក្រគរ, លោក កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់ បានអញ្ជើញបើកវេទិកាសំណួរ-ចម្លើយ និងជួបសំណេះសំណាលយ៉ាងកក់ក្តៅ ជាមួយក្មួយៗសិស្សានុសិស្សថ្នាក់ទី១២ ព្រមទាំងនិស្សិតមកពីសកលវិទ្យាល័យ និងវិទ្យាស្ថាននានា ក្នុងខេត្តពោធិ៍សាត់ សរុបប្រមាណជិត៤ពាន់នាក់ ដើម្បីបញ្ជ្រាបការយល់ដឹងអំពីចក្ខុវិស័យអភិវឌ្ឍន៍ខេត្ត និងការកសាងអនាគតដ៏ភ្លឺស្វាង។ កម្មវិធីនេះដែរ ក៏មានការចូលរួមពីវាគ្មិនកិត្តិយស ចំនួន២រូប គឺលោក ពុយ គា ប្រធានក្លិបអ្នកកាសែតកម្ពុជា និងជាអ្នកនិពន្ធសៀវភៅល្បីៗជាច្រើន និងលោកបណ្ឌិត ផាត កុសល សាស្រ្តាចារ្យផ្នែកវិទ្យាសាស្រ្តនយោបាយ និងទំនាក់ទំនងអន្តរជាតិ មកពីសាកលវិទ្យាល័យញូវយ៉ក សហរដ្ឋអាមេរិក។ លោក កែវ រតនៈ បានសម្តែងក្តីមោទនភាពយ៉ាងខ្លាំង ដោយបានគូសបញ្ជាក់ថា ការជ្រើសរើសយក «ពហុកីឡដ្ឋានសម្តេចតេជោក្រគរ» ជាកន្លែងជួបសំណេះសំណាល គឺដើម្បីឱ្យក្មួយៗសិស្សានុសិស្ស បានឃើញដោយផ្ទាល់នូវសមិទ្ធផលនៃការអភិវឌ្ឍ។ លោកបានរំលឹកពីប្រវត្តិទីតាំង «វាលយន្តហោះសម្តេចយស» ដែលពីអតីតកាលជាទីតាំងយោធា តែបច្ចុប្បន្នបានក្លាយជាតំបន់ទាក់ទាញវិនិយោគិនយ៉ាងខ្លាំង។ លោកបានបញ្ជាក់ថា ទីតាំងនេះនឹងក្លាយជាចំណុចកណ្តាលនៃភាពទំនើប ដោយមានទាំងស្ថានីយ៍សាករថយន្តអគ្គិសនីល្បឿនលឿន និងផ្សារទំនើប ដែលនៅក្បែរតំបន់សេដ្ឋកិច្ចពិសេសពោធិ៍សាត់ ស្ថិតក្នុងឃុំស្នាអន្សារ ស្រុកក្រគរ ខេត្តពោធិ៍សាត់។ លោករដ្ឋមន្ក្រី បានមានប្រសាសន៍ថា ក្មួយៗទាំងអស់គ្នា គឺជាកម្លាំងចលករដ៏សំខាន់ក្នុងការដឹកនាំអនាគតខេត្ត និងប្រទេសជាតិ។ រាល់សមិទ្ធផលដែលកើតឡើងនាពេលនេះ មិនមែនកើតឡើងដោយចៃដន្យឡើយ ប៉ុន្តែវាជាផ្លែផ្កានៃសន្តិភាព និងការខិតខំប្រឹងប្រែងរបស់រាជរដ្ឋាភិបាលគ្រប់ជំនាន់ ពិសេសរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន និងបន្តដោយសម្តេចបវរធិបតី ហ៊ុន ម៉ាណែត។ ដូច្នេះការចូលរួមថែរក្សាសន្តិភាព និងការប្តេជ្ញាចិត្តគាំទ្រការអភិវឌ្ឍជាតិ គឺស្មើនឹងការកសាងអនាគតរបស់ក្មួយៗផ្ទាល់។ លោករដ្ឋមន្ត្រីបានលើកឡើងថា ចំណុចពិសេសនៃ «វេទិកាសំណួរ-ចម្លើយ» បានបើកឱកាសឱ្យសិស្សានុសិស្ស បានសាកសួរផ្ទាល់ទៅកាន់លោកផ្ទាល់ ព្រមទាំងវាគ្មិនកិត្តិយស អំពីទិសដៅការសិក្សា ការជ្រើសរើសជំនាញ និងចក្ខុវិស័យអភិវឌ្ឍន៍ខេត្ត។ វេទិកានេះដែរ បានក្លាយជាមូលដ្ឋានគ្រឹះ និងជាត្រីវិស័យដ៏សំខាន់ ជួយឱ្យក្មួយៗមានភាពច្បាស់លាស់ក្នុងការកំណត់គោលដៅជីវិត និងយល់ដឹងកាន់តែស៊ីជម្រៅ អំពីសក្តានុពលការងារនៅក្នុងខេត្ត ក៏ដូចជាក្នុងប្រទេស និងក្រៅប្រទេស នាពេលអនាគត។ លោកបានបង្ហាញមោទនភាព ចំពោះសមិទ្ធផលថាមពល ខណៈដែរបច្ចុប្បន្ន ខេត្តពោធិ៍សាត់បានក្លាយជាតំបន់ផលិតថាមពលស្អាតធំបំផុតក្នុងតំបន់អាស៊ី, ហើយយើងនឹងសម្រេចបង្កើននូវសមត្ថភាពផលិតថាមពលស្អាត កើនដល់១,១០០មេហ្កាវ៉ាត់ នៅឆ្នាំ២០២៧ខាងមុខ ដែលនេះជាមោទនភាពដ៏ធំធេង របស់ប្រជាពលរដ្ឋយើងទាំងអស់គ្នា។ លោក កែវ រតនៈ បានផ្តាំផ្ញើដល់ក្មួយៗ សូមខិតខំប្រឹងប្រែងសិក្សារៀនសូត្រ និងក្រេបយកចំណេះដឹង បច្ចេកវិទ្យាថ្មីៗបន្ថែមទៀត ព្រមទាំងសូមជូនពរក្មួយៗសិស្សថ្នាក់ទី១២ទាំងអស់ ទទួលបានជោគជ័យក្នុងការប្រឡងសញ្ញាបត្រមធ្យមសិក្សាទុតិយភូមិនាពេលខាងមុខ។ លោកបានបញ្ជាក់បន្ថែមថា ការខិតខំរៀនសូត្រ គឺជាកាតព្វកិច្ចដ៏ថ្លៃថ្លាបំផុតក្នុងសម័យកាលសន្តិភាព ប្រសិនបើយើងជាយុវជនដែលមានចំណេះដឹងខ្ពស់ នោះយើងក៏ជាខែលការពារដ៏រឹងមាំ ក្នុងការថែរក្សាបូរណភាពទឹកដី និងអធិបតេយ្យភាពជាតិ ឱ្យបានគង់វង្សជានិច្ចនិរន្តរ៍។ ជាមួយគ្នានោះ លោកស្នើឱ្យក្មួយៗជាសិស្សនិស្សិត សូមចូលរួមចលនាដាំដើមឈើឱ្យបានយ៉ាងតិចម្នាក់មួយដើមក្នុងមួយឆ្នាំ ដើម្បីឱ្យខេត្តពោធិ៍សាត់មានភាពបៃតងស្អាត។ លោកសង្ឃឹមជឿជាក់ថា យុវជនដែលជាទំពាំងស្នងឫស្សី នឹងចូលរួមធ្វើឱ្យខេត្តរបស់យើង មានការអភិវឌ្ឍន៍ទៅមុខឈានឡើង៕

ព័ត៌មានទាក់ទង