កងកម្លាំងឆ្មាំជាតិអាមេរិក បាននិយាយថា​ ខ្លួនបានប្រេីឧទ្ធម្ភាគចក្រ Black Hawk ដឹកមនុស្សប្រហែល ២០០នាក់ដែលជាប់គាំងទៅកាន់ទីទួលខ្ពស់ ចេញពីជំរំ Taum Sauk ក្នុងទីក្រុង Lesterville រដ្ឋ Missouri ចម្ងាយប្រហែល ១៦០ គីឡូម៉ែត្រ ភាគខាងត្បូងនៃទីក្រុង St. Louis។ ប្រហែលពាក់កណ្តាលនៃអ្នកជម្លៀសចេញពីជំរំនេះ គឺជាកុមារ ហើយអ្នកផ្សេងទៀតជាអ្នកផ្តល់ប្រឹក្សា និងបុគ្គលិក។ ទឹកជំនន់ភ្លាមៗបង្កឡើងដោយភ្លៀងធ្លាក់ខ្លាំងពីព្យុះ បានវាយប្រហារតំបន់ភ្នំ Ozark ក្នុងតំបន់ជនបទភាគអាគ្នេយ៍នៃរដ្ឋ Missouri សហរដ្ឋអាមេរិក​ កាលពីថ្ងៃសុក្រសប្តាហ៍នេះ (ម៉ោងក្នុងតំបន់) ធ្វេីឱ្យមនុស្សរាប់រយនាក់ជាប់គាំងនៅតាមបណ្តោយទន្លេ Black River ដែលហូរច្រោះដោយភ្លៀង។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសៅរ៍ ទី១១ ខែកក្កដា ឆ្នាំ២០២៦។ ដោយឡែកក្រុមសង្គ្រោះតាមទូក បានជួយមនុស្ស ៣នាក់ដែលជាប់គាំងនៅកន្លែងផ្សេងទៀតតាមដងទន្លេក្នុងស្រុក Reynolds។ គិតត្រឹមយប់ថ្ងៃសុក្រ មិនមានរបាយការណ៍អំពីអ្នកស្លាប់នោះទេ។ ការិយាល័យប៉ូលិសស្រុក Reynolds បាន រាយការណ៍ថា ក្រុមសង្គ្រោះបន្ទាន់បានជួយសង្គ្រោះមនុស្សច្រេីនជាង ៩០នាក់ ពីទឹកជំនន់ដែលបានជន់លិចផ្ទះសម្បែង កន្លែងបោះតង់ និងរថយន្ត។ គួរបញ្ជាក់ថា ទន្លេ Black River និងអូរក្បែរៗនោះ បានប្រែទៅជាចរន្តទឹកហូរខ្លាំង ដោយសារព្យុះជាបន្តបន្ទាប់។ ភ្លៀងធ្លាក់បន្ថែមត្រូវបានគេរំពឹងថា នឹងធ្លាក់នៅយប់ថ្ងៃសុក្រនៅក្នុងតំបន់ដែលមានភ្លៀងធ្លាក់ច្រើនរួចទៅហេីយ៕

ព័ត៌មានទាក់ទង