ការចាប់បាល់ក្រឡក (error) របស់កីឡាករចាំទី Senne Lammens ប្តូរចូលជំនួស Thibaut Courtois ដែលមាន របួសក្នុងវគ្គទី២ នោះ វាប្រៀបបីដូចជាហុចដងឱ្យ Mikel Merino ដែលរត់មកបន្ថែមចូលទីតែម្តងនៅនាទី៨៨។ ការធ្លាក់ចេញពី FIFA World Cup 2026 ត្រឹមវគ្គ ៨ក្រុមចុងក្រោយរបស់ប៊ែលហ្ស៊ិក ក្រោមថ្វីជើងរបស់អេស្ប៉ាញ ២-១ វាប្រៀបបីដូចជាចំណុចបញ្ចប់នៃសម័យមាសរបស់ក្រុមបិសាចក្រហមអឺរ៉ុបដូច្នោះដែរ។ នេះបើយោងតាមការចេញផ្សាយដោយគេហទំព័រកីឡា BBC។ ទោះជាយ៉ាងណា វានឹងក្លាយជាឱកាសចុងក្រោយរបស់តារាឆ្នើមទាំង ៤នាក់ដែលបានបង្ហាញខ្លួននៅ World Cup 2014 រួមមាន Courtois, Romelu Lukaku, Keven de Bruyne និង Axel Witsel ដែលត្រូវខកចិត្តទៅវិញ ក្នុងការឈ្នះជើងឯកពិភពលោកជាលើកដំបូងនេះ។ ប៊ែលហ្ស៊ិក ចាប់ផ្តើមធ្វើបានល្អដំបូងនៅ World Cup ចាប់តាំងពីឆ្នាំ២០០២ និងបានឈានដល់វគ្គ ៨ក្រុមដូចពេលនេះដែរ មុនពេលប្រសើរឡើងមួយកម្រិតទៀតកាល World Cup 2018 នៅរុស្ស៊ី តាមរយៈឆ្លងចូលវគ្គពាក់កណ្តាលផ្តាច់ព្រ័ត្រ និងដណ្តើមបានចំណាត់ថ្នាក់លេខ៣ ថែមទៀត។ ទោះជាយ៉ាងណា រជ្ជកាលមាសរបស់ពួកគេទំនងដល់ទីបញ្ចប់ហើយ ដ្បិតកីឡាករបច្ចុប្បន្នសុទ្ធតែមានវ័យជាង ៣០ឆ្នាំ ឡើងទៅដោយរួមមាន Trossard, Mechele, Castagne, Vanaken និង Meunier ជាដើម គ្រាដែល Courtois, Lukaku និង De Bruyne គឺជា World Cup ចុងក្រោយរបស់ពួកគេស្រាប់ហើយ៕

ព័ត៌មានទាក់ទង