ក្រុមតោ៣ អង់គ្លេស អតីតជើងឯក World Cup 1966 ត្រូវប៉ះក្រុមនៅតំបន់អឺរ៉ុបដូចគ្នាគឺ ន័រវែស ដែលពួកគេ (ន័រវែស) បានទម្លាក់អតីតជើងខ្លាំងម្ចាស់ពាន World Cup ៥សម័យ ប្រេស៊ីលចេញពី World Cup ឆ្នាំនេះត្រឹមវគ្គ ១៦ក្រុម ដើម្បីឡើងមកជួបអង់គ្លេស ដែលបានយកឈ្នះសហម្ចាស់ផ្ទះមិចស៊ិកផងនោះនាម៉ោង ៤ទៀបភ្លឺស្អែកនេះ (ម៉ោងនៅកម្ពុជា) ពីក្នុងវគ្គ ៨ក្រុម។ លោក Stale Solbakken អ្នកចាត់ការទូទៅក្រុមជម្រើសជាតិន័រវែសបានថ្លែងប្រាប់ BBC Sport ថា គូប្រជែងរបស់លោក តោកំណាចអង់គ្លេស គឺពិតជាស័ក្តសមក្នុងការឡើងវគ្គពាក់កណ្តាលផ្តាច់ព្រ័ត្រនៃ FIFA World Cup 2026។ លោក Solbakken បានថ្លែងក្នុងកិច្ចសម្ភាសន៍ថា «ពួកគេគឺជាក្រុមដែលគួរឱ្យចាប់អារម្មណ៍មួយ ប៉ុន្តែមិនជាខ្លាំងដាច់នោះដែរ បើធៀបនឹងន័រវែស។ ការប្រឈមមុខនឹងអង់គ្លេសលើកនេះ ខ្ញុំគិតថា ពួកគេមានសម្ពាធច្រើនជាងពួកយើង ក៏ប៉ុន្តែពួកយើងក៏នឹងដាក់សម្ពាធលើខ្លួនឯងដែរ ដ្បិតពេលចាប់ផ្តើមប្រកួត ខ្ញុំមិនគិតថា កីឡាករគ្រប់គ្នារងសម្ពាធឡើយពីអង់គ្លេសឡើយ»។ គួរបញ្ជាក់ផងថា ក្នុងក្រុមជម្រើសជាតិន័រវែសមានកីឡាករស្នូល ២រូបដែលកំពុងលេងនៅ Premier League របស់អង់គ្លេសបច្ចុប្បន្នគឺ Martin Odegaard ក្នុងក្លិប Arsenal និង Erling Haaland របស់ Manchester City៕

ព័ត៌មានទាក់ទង