ខេត្តកំពត៖លោកបណ្ឌិត ម៉ៅ ធនិន អភិបាលខេត្តកំពត នាព្រឹកថ្ងៃទី៩ ខែកក្កដា ឆ្នាំ២០២៦នេះ បានដឹកនាំមន្ត្រីរាជការ កងកម្លាំង អាជ្ញាធរ និងអ្នកពាក់ព័ន្ធក្រោមឱវាទ ចុះផ្ដល់វិញ្ញាបនបត្រសម្គាល់ម្ចាស់អចលនវត្ថុ(ប្លង់រឹង) ជូនប្រជាពលរដ្ឋ នៅភូមិស្រែកាន់ខាងកើត ឃុំទូកមាសខាងកើត ស្រុកបន្ទាយមាស ដែលមានក្បាលដីសរុបចំនួន ១,២២៧ក្បាលដី ស្មើនឹង ៥៤០គ្រួសារ។ លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពត បានឱ្យដឹងថា ការប្រកាសចែកវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង) ត្រូវបានប្រគល់ជូនប្រជាពលរដ្ឋចំនួន ១ភូមិ គឺភូមិស្រែកាន់ខាងកើត ឃុំទូកមាសខាងកើត ស្រុកបន្ទាយមាស ដែលមានក្បាលដីសរុបចំនួន ១,២២៧ក្បាលដី ស្មើនឹង ៥៤០គ្រួសារ ហើយការប្រកាសបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យដីធ្លីនាពេលនេះ មានចំនួន ៣ភូមិ មានភូមិដូនទាវ ភូមិឫស្សីជុំ និងភូមិគោកវែង ស្ថិតក្នុងឃុំត្នោតចុងស្រង់ ស្រុកបន្ទាយមាស ដែលមានក្បាលដីសរុបចំនួន ៤,៨៣៥ក្បាលដី ស្មើនឹង ១,៥៩៩ គ្រួសារ។ នាឱកាសនោះលោកអភិបាលខេត្តកំពត បានមានប្រសាសន៍ថា ក្រោមការគិតគូរពីសំណាក់សម្តេចតេជោ ហ៊ុន សែន អតីតនាយករដ្ឋមន្ត្រី បន្តរហូតមកដល់អាណត្តិទី៧ ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី គោលនយោបានដីធ្លី នៅតែជាគោលនយោបាយអាទិភាពមួយ ក្នុងចំណោមគោលនយោបាយផ្សេងៗទៀត ដើម្បីឆ្លើយតប បំពេញតម្រូវការ និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋ។ អភិបាលខេត្តកំពត បន្តថា ក្រោយបញ្ចប់សង្គ្រាមផ្ទៃក្នុងរ៉ាំរ៉ៃរយៈពេល ៣ឆ្នាំ ៨ខែ និង ២០ថ្ងៃ កម្ពុជាត្រូវបានស្តារឡើងវិញ ពីគំនរផេះផង់ វិស័យនានា ត្រូវបានចាប់ផ្តើមរៀបចំឡើងវិញជាបន្តបន្ទាប់ ហើយក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី សម្តេចបានលះបង់គ្រប់បែបយ៉ាង ដើម្បីឱ្យប្រទេស និងប្រជាជនទទួលបានសន្តិភាពពេញលេញ។ ក្រោយពីមានសុខសន្តិភាព ប្រទេសកម្ពុជាមានការរីកចម្រើន និងអភិវឌ្ឍន៍លើគ្រប់វិស័យ ពិសេសវិស័យដីធ្លី ដែលតម្រូវឱ្យមានគោលនយោបាយមួយដ៏ច្បាស់លាស់ ដើម្បីធ្វើយ៉ាងណាឱ្យប្រជាពលរដ្ឋមានដីធ្លីជាកម្មសិទ្ធិពិតប្រាកដ និងអាចឱ្យពួកគាត់ទាញយកផលប្រយោជន៍ពីវិស័យដីធ្លីនេះ។ លោកអភិបាលខេត្ត បានបន្តបញ្ជាក់ថា ក្រោមកិច្ចចង្អុលការយ៉ាងម៉ឺងម៉ាត់បំផុត ពីសំណាក់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ទៅកាន់ក្រសួងដែនដី នគរូបនីយកម្ម និងសំណង់ ដែលមាន លោក សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងដែនដី បានបញ្ជាត្រង់ចុះមកមន្ទីរជំនាញ និងអាជ្ញាធរខេត្ត អាជ្ញាធរស្រុក ដើម្បីធ្វើយ៉ាងណាពន្លឿននៃការចេញបណ្ណកម្មសិទ្ធិឱ្យបានលឿនបំផុត ជូនពលរដ្ឋនៅទូទាំងប្រទេស។ ក្នុងអាណត្តិទី៧នេះ ក្រោមការដឹកនាំប្រកបដោយគតិបណ្ឌិតរបស់សម្តេចធិបតី ហ៊ុន ម៉ាណែត រាជរដ្ឋាភិបាលបានកំណត់យកគោលនយោបានដីធ្លី ជាគោលនយោបាយអាទិភាពមួយ ក្នុងចំណោមគោលនយោបាយផ្សេងៗទៀតដែលត្រូវយកចិត្តទុកដាក់បំផុត ក្នុងន័យដើម្បីបំពេញតម្រូវការ និងលើកកម្ពស់ជីវភាពរស់នៅរបស់បងប្អូនប្រជាពលរដ្ឋ៕

ព័ត៌មានទាក់ទង