រាជធានីភ្នំពេញ៖ជើងហោះហើរនេះនឹងចាប់ផ្តើមពីថ្ងៃទី១៩ ខែធ្នូ ឆ្នាំ២០២៦ ដល់ថ្ងៃទី៣ ខែមេសា ឆ្នាំ២០២៧ ដោយគ្រោងធ្វើការហោះហើរមួយជើងក្នុងមួយសប្តាហ៍ ដោយប្រើយន្តហោះ Boeing 787-8 Dreamliner ឬយន្តហោះប្រភេទប្រហាក់ប្រហែល។កម្ពុជាបាន​ស្វាគមន៍យ៉ាងកក់ក្តៅចំពោះការប្រកាស​ពីការតភ្ជាប់ជើងហោះហើរត្រង់តាមលក្ខណៈ Charter តាមរដូវកាល រវាងទីក្រុងប្រាក (Prague) នៃសាធារណរដ្ឋឆេក មកកាន់ខេត្តព្រះសីហនុ ដើម្បីនាំ​ភ្ញៀវទេសចរពីអឺរ៉ុបមកទស្សនាកម្ពុជា ​ដែលជើងហោះហើរនេះ គ្រោងនឹងប្រតិបត្តិការដោយក្រុមហ៊ុន TUI Airways។ លោក ស៊ីន ចាន់សិរីវត្ថា ​រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល (SSCA) បានគូសបញ្ជាក់ថា តាមរយៈ​ការតភ្ជាប់ជើងហោះហើរត្រង់​ដំបូងបង្អស់រវាងសាធារណរដ្ឋឆេក និងកម្ពុជា​ ​បានបង្ហាញពីការកើនឡើងនៃទំនុកចិត្តរបស់ទីផ្សារទេសចរណ៍អឺរ៉ុបចំពោះកម្ពុជា។ ​បន្ថែមពីនេះ វានឹងជួយពង្រីកទីផ្សារទេសចរណ៍ពីអឺរ៉ុប ជាពិសេសភ្ញៀវទេសចរដែលមានកម្រិតចំណាយខ្ពស់។ លើសពីនេះ ជើងហោះហើរនេះក៏នឹងគាំទ្រដល់ការអភិវឌ្ឍអាកាសយានដ្ឋានអន្តរជាតិព្រះសីហនុ និងការអភិវឌ្ឍតំបន់ឆ្នេរសមុទ្រកម្ពុជាទាំងមូល រួមចំណែកពង្រឹងការតភ្ជាប់អាកាសចរណ៍អន្តរជាតិ និងការប្រកួតប្រជែងរបស់វិស័យទេសចរណ៍កម្ពុជា។ លោកបាននិយាយយ៉ាងដូច្នេះថា «ការតភ្ជាប់ជើងហោះហើរត្រង់ពីទីក្រុងប្រាក មកកាន់ខេត្តព្រះសីហនុ គឺជាសញ្ញាវិជ្ជមានមួយដែលបង្ហាញពីការកើនឡើងនៃទំនុកចិត្តរបស់ទីផ្សារទេសចរណ៍អឺរ៉ុបមកលើកម្ពុជា។ SSCA នឹងបន្តធ្វើការជាមួយដៃគូអន្តរជាតិ ដើម្បីពង្រឹងការតភ្ជាប់អាកាសចរណ៍ និងគាំទ្រកំណើនទេសចរណ៍ និងសេដ្ឋកិច្ចរបស់កម្ពុជា»។​ ទោះជាយ៉ាងណា​ ការភ្ជាប់ជើងហោះហើរត្រង់នេះ គឺជាជើងហោះហើរប្រភេទ Charter តាមរដូវកាលប៉ុណ្ណោះ ដែលបានរៀបចំឡើងដោយប្រតិបត្តិករទេសចរណ៍សម្រាប់កញ្ចប់ទេសចរណ៍ ហើយមិនមែនជាជើងហោះហើរពាណិជ្ជកម្មតាមកាលវិភាគនោះទេ។ ប្រសិនបើទីផ្សារមានការឆ្លើយតបល្អ និងមានតម្រូវការបន្ត វាក៏អាចជាមូលដ្ឋានសម្រាប់ការពិចារណាពង្រីកទៅជាជើងហោះហើរតាមកាលវិភាគនាពេលអនាគតផងដែរ។ លោកបានឱ្យដឹ​ងថា បច្ចុប្បន្ន រដ្ឋលេខាធិការដ្ឋានអាកាសចរស៊ីវិល (SSCA) កំពុងធ្វើការយ៉ាងសកម្មជាមួយក្រុមហ៊ុនអាកាសចរណ៍ និងដៃគូទេសចរណ៍អន្តរជាតិជាច្រើន ដើម្បីពង្រីកបណ្តាញជើងហោះហើរមកកាន់អាកាសយានដ្ឋានអន្តរជាតិទាំងបីរបស់កម្ពុជា។ ការបើកជើងហោះហើរថ្មីអាស្រ័យលើកត្តាសំខាន់ៗជាច្រើន រួមមានតម្រូវការទីផ្សារ លទ្ធភាពពាណិជ្ជកម្មរបស់ក្រុមហ៊ុនអាកាសចរណ៍ ការរៀបចំកញ្ចប់ទេសចរណ៍ និងការត្រៀមសមត្ថភាពប្រតិបត្តិការរបស់អាកាសយានដ្ឋាន។ ទោះជាយ៉ាងណា ការបើកជើងហោះហើរថ្មីអាស្រ័យលើកត្តាសំខាន់ៗជាច្រើន រួមមាន​ តម្រូវការទីផ្សារ, លទ្ធភាពពាណិជ្ជកម្មរបស់ក្រុមហ៊ុនអាកាសចរណ៍, ការរៀបចំកញ្ចប់ទេសចរណ៍​, ការត្រៀមសមត្ថភាពប្រតិបត្តិការរបស់អាកាសយានដ្ឋាន​​​និងការពិនិត្យ អនុញាត្តិ និងការអនុម័តបទប្បញ្ញត្តិពាក់ព័ន្ធ។ លោកបញ្ជាក់បន្ថែមថា «ដូច្នេះ SSCA មិនទាន់អាច បញ្ជាក់ចំនួនក្រុមហ៊ុនអាកាសចរណ៍ ឬប្រតិបត្តិករទេសចរណ៍ថ្មីជាផ្លូវការបាន នៅឡើយទេ រហូតដល់ការសម្រេចចិត្តពាណិជ្ជកម្មត្រូវបានបញ្ចប់ និងមានការប្រកាសជាផ្លូវការ។ ដោយឡែក ចំពោះកិច្ចព្រមព្រៀងបើកចំហរជើងមេឃរវាងកម្ពុជា និងសហរដ្ឋអាមេរិក កិច្ចព្រមព្រៀងនេះជាជំហានដ៏សំខាន់ក្នុងការពង្រឹងក្របខណ្ឌច្បាប់ និងបង្កើតបរិយាកាសអំណោយផលសម្រាប់ការអភិវឌ្ឍសេវាដឹកជញ្ជូនតាមផ្លូវអាកាសរវាងប្រទេសទាំងពីរ»។​ ​តាមតាម​ស្ថានទូតសាធារណរដ្ឋឆែក (Czech) ប្រចាំ​កម្ពុជា​ បានឱ្យដឹងថា ភ្ញៀវទេសចរឆែក (Czech) រាប់រយនាក់ត្រូវបានគេរំពឹងថានឹង មកទស្សនាឆ្នេរសមុទ្រកម្ពុជាជារៀងរាល់សប្តាហ៍ ខណៈ ដែលភ្នាក់ងារទេសចរណ៍ឆែក (Czech) ចំនួនពីរបាន ចាប់ផ្តើមផ្តល់ជូនកញ្ចប់ទេសចរណ៍ជាមួយនឹង ជើងហោះហើរត្រង់ពីទីក្រុងប្រាក (Prague) ទៅកាន់ទីក្រុង ព្រះសីហនុ​៕

ព័ត៌មានទាក់ទង