រាជធានីភ្នំពេញ៖ ការប្រកាស និងបង់ប្រាក់ពន្ធលើអចលនទ្រព្យសម្រាប់ឆ្នាំ២០២៦ នឹងផុតកំណត់នៅថ្ងៃទី៣០ ខែកញ្ញា ឆ្នាំ២០២៦ខាងមុខ ក្នុងករណីខកខានមិនបានអនុវត្តកាតព្វកិច្ចពន្ធ លើអចលនទ្រព្យតាមកាលបរិច្ឆេទកំណត់ ម្ចាស់អចលនទ្រព្យនឹងទទួលរងនូវទណ្ឌកម្មរដ្ឋបាល (ពន្ធបន្ថែម និងការប្រាក់) ស្របតាមច្បាប់ជាធរមាន។ ដើម្បីផ្តល់ភាពងាយស្រួល សាមញ្ញ និងទាន់ពេលវេលា អគ្គនាយកដ្ឋានពន្ធដារ បានផ្តល់ជម្រើសកាន់តែប្រសើរ ដល់ម្ចាស់អចលនទ្រព្យក្នុងការបង់ពន្ធ ក្នុងនោះរួមមាន៖ * តាមកម្មវិធីទូរស័ព្ទដៃអ្នកជាប់ពន្ធ GDT Taxpayer App * នៅតាមបណ្តាធនាគារពាណិជ្ជ ឬសាខាធនាគារពាណិជ្ជដៃគូ របស់អគ្គនាយកដ្ឋានពន្ធដារ * នៅអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌ ដែលអចលនទ្រព្យស្ថិតនៅ។ សូមបញ្ជាក់ផងដែរថា ពន្ធលើអចលនទ្រព្យជាប្រភេទពន្ធប្រចាំឆ្នាំ ដែលប្រមូលលើអចលនទ្រព្យរួមមាន ដី ផ្ទះ អគារ និងសំណង់ផ្សេងៗ ដែលស្ថិតនៅក្នុងរដ្ឋបាលរាជធានី ខេត្ត នៃព្រះរាជាណាចក្រកម្ពុជា។ ពន្ធលើអចលនទ្រព្យត្រូវប្រមូលពីអចលនទ្រព្យមានតម្លៃលើសពី ១០០ ០០០ ០០០ (មួយរយលាន) រៀលតាមអត្រា ០.១% ដោយត្រូវគណនាតាមរូបមន្តខាងក្រោម៖ មូលដ្ឋានគិតពន្ធ = (តម្លៃអចលនទ្រព្យ ៨០%) - ១០០ ០០០ ០០០ ពន្ធអចលនទ្រព្យ = មូលដ្ឋានគិតពន្ធ x ០.១% ដើម្បីឱ្យអ្នកជាប់ពន្ធឈ្វេងយល់កាន់តែច្បាស់ និងអនុវត្តកាតព្វកិច្ចសារពើពន្ធបានត្រឹមត្រូវ អគ្គនាយកដ្ឋានពន្ធដារ បានរៀបចំខិត្តប័ណ្ណ ស្តីពីពន្ធលើអចលនទ្រព្យ ដែលមានការចងក្រង លម្អិតពី កម្មវត្ថុនៃពន្ធ និយមន័យពាក្យគន្លឹះសំខាន់ៗ ការលើកលែងពន្ធ មូលដ្ឋានគិតពន្ធ អត្រាពន្ធ ការគណនានិងឧទាហរណ៍ ព្រមទាំងបែបបទ និងនីតិវិធីនៃការប្រកាស និងបង់ប្រាក់ពន្ធនេះផងដែរ៕

ព័ត៌មានទាក់ទង