រាជធានីភ្នំពេញ៖សម្តេចមហាបវរធិបតី ហ៊ុន ម៉ាណែត បានណែនាំឱ្យមានការគិតគូរយកក្មេងទំនើង​ទៅ​ជួយ​ការងារនៅជួរមុខ ដូចជាការជីកលេណដ្ឋានជាដើម តែមិនមែនទៅប្រយុទ្ធនោះទេ។សម្តេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានបង្ហាញ​ការគាំទ្រវិធានការរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា គិតគូរ​យកក្មេងទំនើងទៅជួយការងារនៅជួរមុខ។ ក្នុងជំនួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំ​មន្ទីរ អង្គភាពនានាជុំវិញខេត្តកំពង់ស្ពឺ នាព្រឹកថ្ងៃសៅរ៍ ទី២ ខែឧសភា ឆ្នាំ២០២៦នេះ សម្តេចតេជោ ហ៊ុន សែន បានបង្ហាញការគាំទ្រចំពោះវិធានការនេះ។ សម្តេចតេជោ ហ៊ុន សែន បានបញ្ជាក់ដូច្នេះ «ឱ្យដេកស៊ីបាយមិនប្រាកដថាកែទេ ព្រោះ​ពួក​​គេ​ក្លាហានណាស់។ តែយើងមិន​ប្រគល់​កាំបិត ប្រគល់គ្រាប់ឱ្យគេទេ។ យកទៅ​ព្រំ​ដែន ជួយ​ដឹកស្បៀង ជួយជីកលេណដ្ឋាន...បម្រើឱ្យវិស័យយោធា»។ ក្រៅពីមានប្រសាសន៍គាំទ្រនូវវិធានការរបស់រាជរដ្ឋាភិបាលលើក្មេងទំនើងខាងលើនេះហើយ សម្តេចតេជោ ហ៊ុន សែន ក៏បានមានប្រសាសន៍ពាក់ព័ន្ធប្រវត្តិសាស្ត្រ ក៏ដូចជារឿង​របស់កម្ពុជាក្នុងអតីតកាលពាក់ព័ន្ធខេត្តកំពង់ស្ពឺ មានដូចជាបញ្ហានយោបាយ ការអភិ​វឌ្ឍ និងសេដ្ឋកិច្ចជាដើម។ ក្រៅពីលើកបញ្ហាពាក់ព័ន្ធខេត្តកំពង់ស្ពឺហើយនោះ សម្តេចតេជោ ក៏បានលើក​បញ្ហា​ពាក់​ព័ន្ធសភាពការណ៍របស់ពិភពលោក និងនៅក្នុងប្រទេសកម្ពុជា។ មិនខុសពីខេត្តកំពង់ចាម និងត្បូងឃ្មុំនោះទេ នៅចំពោះមុខថ្នាក់ដឹកនាំខេត្ត ក្រុមប្រឹក្សា​ខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាក្នុងខេត្តកំពង់ស្ពឺនេះ សម្តេចតេជោ ហ៊ុន សែន ក៏បានណែនាំឱ្យចិត្តទុកដាក់លើបញ្ហាមួយចំនួន។ បញ្ហាដែលសម្តេចតេជោប្រមុខរដ្ឋស្តីទី បានណែនាំឱ្យយកចិត្តទុកដាក់នោះ មានដូចជា​ការយកចិត្តទុកដាក់អនុវត្តន៍នយោបាយភូមិឃុំមានសុវត្ថិភាព, យកចិត្តទុកដាក់ការ​ផ្តល់​សេវាសាធារណៈឱ្យបានល្អប្រសើរ, ចូលរួមគាំទ្រការកៀរគរពន្ធដារ និងពន្ធគយ, យកចិត្ត​ទុក​ដាក់ទប់ស្កាត់បទល្មើសធនធានធម្មជាតិ, យកចិត្តទុកដាក់ដោះស្រាយវិវាទ​ដីធ្លី​ជូន​ប្រជាពលរដ្ឋតាមរយៈយន្តការក្រៅប្រព័ន្ធតុលាការ និងការវាស់វែងចេញបណ្ណកម្មសិទ្ធ​ដី​ធ្លី និងយកចិត្តទុកដាក់ចំពោះអតីតយុទ្ធជន៕

ព័ត៌មានទាក់ទង