បណ្តឹងនេះត្រូវបានដាក់ក្នុងនាមដើមបណ្តឹងចំនួន ៨នាក់ ដែលអះអាងថា ពួកគេបានរងផលប៉ះពាល់ពីការប្រើប្រាស់សេវារបស់ Meta នៅពេលមានអាយុក្រោម ១៨ឆ្នាំ និងកំពុងទាមទារសំណង។ អ្នកនាំពាក្យ Meta បានឆ្លើយតបតាមអ៊ីមែលថា៖ «យើងបានដឹងអំពីបណ្តឹងនេះ ហើយយើងនឹងតស៊ូការពារខ្លួនយ៉ាងម៉ឺងម៉ាត់»។ ចំណែកតុលាការបានចេញដីកាហាមឃាត់ការផ្សព្វផ្សាយព័ត៌មានដែលអាចបង្ហាញអត្តសញ្ញាណដើមបណ្តឹង និងខ្លឹមសារនៃពាក្យបណ្តឹង។ ក្រុមហ៊ុន Meta Platforms ដែលជាម្ចាស់ Facebook និង Instagram កំពុងប្រឈមនឹងបណ្តឹងជាក្រុមនៅតុលាការសហព័ន្ធអូស្ត្រាលី ដោយចោទប្រកាន់ថា បណ្តាញសង្គមទាំងពីរបានបង្ហាញខ្លឹមសារបង្កគ្រោះថ្នាក់ដល់កុមារ និងប្រើក្បួនដោះស្រាយដើម្បីធ្វើឱ្យពួកគេញៀននឹងការប្រើប្រាស់។ បណ្តឹងនេះត្រូវបានដាក់ក្នុងខែតុលានេះដោយក្រុមហ៊ុនច្បាប់ MinterEllison ហើយអាចជាករណីដំបូងនៅអូស្ត្រាលីដែលចោទប្រកាន់បណ្តាញសង្គមថាបង្កគ្រោះថ្នាក់ដល់អ្នកប្រើប្រាស់ ជាពិសេសកុមារ និងក្មេងជំទង់។ នេះបើយោងតាមទីភ្នាក់ងារសារព័ត៌មាន Reuters ចុះផ្សាយនៅថ្ងៃទី២២ ខែតុលា ឆ្នាំ២០២៦។ បណ្តឹងនេះកើតឡើងចំពេលអូស្ត្រាលីកំពុងរឹតបន្តឹងវិធានការលើក្រុមហ៊ុនបច្ចេកវិទ្យាធំៗ។ ប្រទេសនេះបានអនុវត្តការហាមឃាត់កុមារអាយុក្រោម ១៦ឆ្នាំប្រើប្រាស់បណ្តាញសង្គម ដែលជាវិធានការដំបូងគេបង្អស់លើពិភពលោក ហើយក៏បានស្នើច្បាប់ថ្មីដែលអាចអនុញ្ញាតឱ្យអ្នកប្រើប្រាស់បិទការបង្ហាញខ្លឹមសារដែលជ្រើសរើសដោយក្បួនដោះស្រាយផងដែរ។ គួរជម្រាបថា កាលពីខែសីហា Meta ក៏បានយល់ព្រមបង់ប្រាក់ចំនួន ១៨ពាន់លានដុល្លារ ដើម្បីដោះស្រាយបណ្តឹងជាមួយរដ្ឋស្ទើរតែទាំងអស់នៅសហរដ្ឋអាមេរិក ពាក់ព័ន្ធនឹងការចោទប្រកាន់ថា ក្រុមហ៊ុនបានរចនាបណ្តាញសង្គមឱ្យធ្វើឱ្យកុមារញៀននឹងការប្រើប្រាស់។ ទោះជាយ៉ាងណា ករណីនៅអូស្ត្រាលីនេះនៅស្ថិតក្នុងដំណាក់កាលបណ្តឹង ដោយការចោទប្រកាន់ទាំងនេះមិនទាន់ជាការសម្រេចរបស់តុលាការថា Meta មានកំហុសនោះទេ៕

ព័ត៌មានទាក់ទង