ក្រុងព្រះសីហនុ៖នៅព្រឹកថ្ងៃសុក្រ ១៥កើត ខែពិសាខ ឆ្នាំមមី អដ្ឋស័ក ព.ស.២៥៦៩ ត្រូវ​នឹង​ថ្ងៃទី០១ ខែឧសភា ឆ្នាំ២០២៦នេះ សម្តេច​មហាបវរធិបតី ហ៊ុន ម៉ាណែត នាយក​រដ្ឋ​មន្ត្រីកម្ពុជា បានអញ្ជើញ​ជួប​សំណេះសំណាលមួយមន្ត្រីរាជការ បុគ្គលិក កម្មករ និយោជិត ដែល​កំពុង​​បម្រើការងារនៅ​កំពង់ផែស្វយ័តក្រុងព្រះសីហនុ។ ពិធី​សំណេះ​សំណាល​នា​ព្រឹក​ថ្ងៃនេះ ធ្វើឡើងជាការអបអរសាទរខួប​អនុ​ស្សា​វរីយ៍លើកទី១៤០ នៃទិវាពលកម្ម​អន្តរ​ជាតិ ១ ឧសភា ឆ្នាំ២០២៦។ ខាងក្រោមជាខ្លឹមសារសំខាន់ៗរបស់ សម្តេចមហាបវរធិបតី ហ៊ុន ម៉ាណែត ឱកាសអញ្ជើញ​សំណេះសំណាល​ជាមួយមន្ត្រីរាជការ បុគ្គលិក កម្មករ និយោជិតកំពង់ផែស្វយ័តក្រុងព្រះសីហនុ៖ * សម្តេចមហាបវរធិបតី ហ៊ុន ម៉ាណែត បានថ្លែងអំណរគុណដល់រដ្ឋាភិបាល និងប្រជាជនជប៉ុន ក៏ដូចជាអង្គការចៃកា ដែលបានជួយអភិវឌ្ឍន៍ហេដ្ឋារចនា​សម្ព័ន្ធនានា​នៅកម្ពុជា។ * សម្តេចមហាបវរធិបតី ហ៊ុន ម៉ាណែត បានថ្លែងថា ជប៉ុន គឺជាប្រទេសនាំមុខ ដែលបាន​ជួយអភិវឌ្ឍពង្រីកសមត្ថភាពកំពង់ផែស្វយ័តក្រុងព្រះសីហនុ ចាប់តាំងពី​ឆ្នាំ១៩៩៦។ * សម្តេចមហាបវរធិបតី ហ៊ុន ម៉ាណែត បានថ្លែងថា ជប៉ុនមិនត្រឹមជួយផ្នែកហិរញ្ញវត្ថុប៉ុណ្ណោះទេ តែបានជួយសាងសង់និងការគ្រប់គ្រងផែថែមទៀតផង។ * សម្តេចមហាបវរធិបតី ហ៊ុន ម៉ាណែត បានស្នើជប៉ុន ជួយលើការងារមជ្ឈមណ្ឌល​ភស្តុភារ​កម្មរបស់កម្ពុជា ដែលមានមូលដ្ឋាននៅជាប់នឹងផែស្វយ័តក្រុងព្រះសីហនុ។ * សម្តេចមហាបវរធិបតី ហ៊ុន ម៉ាណែត បានថ្លែងថា រាជរដ្ឋាភិបាលមានចក្ខុវិស័យ ដាក់ចេញសកម្មភាពជាក់ស្តែងក្នុងការអភិវឌ្ឍប្រទេសជាតិ។ សម្តេចក៏ឆ្លៀតប្រតិកម្មនឹងអ្នកវិភាគមួយចំនួនដែលលើកឡើងថា មិនឃើញធ្វើឱ្យសោះនោះ ហេតុអ្វីមិនព្រមមើលសមិទ្ធផលត្រូវបានសម្ពោធជាបន្តបន្ទាប់។ * សម្តេចមហាបវរធិបតី ហ៊ុន ម៉ាណែត បានថ្លែងថា ការកសាងហេដ្ឋារចនាសម្ព័ន្ធ គឺជាកិច្ចការស្នូលមួយរបស់រាជរដ្ឋាភិបាល។ * សម្តេចមហាបវរធិបតី ហ៊ុន ម៉ាណែត បានស្នើជប៉ុន ជួយពិនិត្យលទ្ធភាពក្នុងការគាំទ្រ​ដល់ការអភិវឌ្ឍ ហេដ្ឋារចនាសម្ព័ន្ធដឹកជញ្ជូន ប្រព័ន្ធឡូជីស្ទីក និងប្រព័ន្ធ​ចម្លោះ​ទឹក​កខ្វក់ នៅកម្ពុជាបន្ថែមទៀត។ ជាពិសេសជួយសម្របសម្រួលរៀបចំឱ្យមានកម្មវិធី​ផ្លាស់ប្តូរចំណេះដឹង, ជំនាញ, បទពិសោធ និង បច្ចេកវិទ្យា លើការអភិវឌ្ឍវិស័យហេដ្ឋ- រចនាសម្ព័ន្ធ ដើម្បីជំរុញការអភិវឌ្ឍវិស័យហេដ្ឋារចនាសម្ព័ន្ធរូបវន្តកម្ពុជា ឱ្យកាន់តែ​ប្រ​សើរឡើង។ * សម្តេចមហាបវរធិបតី ហ៊ុន ម៉ាណែត បានថ្លែងថា ទំនិញឆ្លងកាត់កំពង់ផែស្វយ័តក្រុង​ព្រះ​សីហនុ បានកើន​ឡើងគួរឱ្យកត់សម្គាល់ពីមួយឆ្នាំទៅមួយឆ្នាំ។ ជាង២ឆ្នាំចុង​ក្រោយ​នេះ សមត្ថភាពកំពង់ផែស្វយ័តក្រុងព្រះសីហនុ បានកើនឡើងពី ៥៥ម៉ឺនTEUs ដល់ ១,៣ លានTEUs ក្នុងមួយឆ្នាំ។ * សម្តេចមហាបវរធិបតី ហ៊ុន ម៉ាណែត បានណែនាំដល់កំពង់ផែស្វយ័តក្រុងព្រះសីហនុ ត្រូវបន្តពង្រឹងកិច្ចសហប្រតិបត្តិការល្អជាមួយទីភ្នាក់ងារ JICA លើការងារអាទិភាព រួមមានៈ ទី១) ជំរុញការអនុវត្តគម្រោងសាងសង់ចំណតផែកុងតឺន័រទឹកជ្រៅថ្មី ជំហាន​ទី២ និង ទី៣ ឱ្យសម្រេចបានតាមផែនការ, ទី២) ជំរុញការចូលរួមសិក្សារៀបចំផែន​​ការ​មេ សម្រាប់ប្រែក្លាយកំពង់ផែស្វយ័តក្រុងព្រះសីហនុ ទៅជាកំពង់ផែតំបន់ និងមជ្ឈ​មណ្ឌល​ឡូជីស្ទីក, ទី៣) ជំរុញការតភ្ជាប់បណ្តាញដឹកជញ្ជូនផ្ទៃក្នុងប្រទេស មក​កាន់​កំពង់ផែស្វយ័តក្រុងព្រះសីហនុ, និង ទី៤)ជំរុញការធ្វើទំនើបកម្ម​កំពង់ផែ​ស្វយ័ត​ក្រុង​ព្រះសីហនុ (Port Digitalization) ឱ្យក្លាយជា E-Port។ * សម្តេចមហាបវរធិបតី ហ៊ុន ម៉ាណែត បានណែនាំឱ្យមានការគិតគូរ និងប្រើប្រាស់ឱ្យបានច្បាស់លាស់នូវតួនាទីនៃកំពង់ផែនីមួយៗរបស់កម្ពុជា។ ក្នុងនោះកម្ពុជា ក៏កំពុងគិតគូរពីការរៀបចំផែបម្រើដល់ការស្តុកប្រេងឥន្ធនៈ និងហ្កាសផងដែរ បន្ទាប់ពីជួបវិបត្តិកើតចេញពីសង្គ្រាមនៅអ៉ីរ៉ង់។ * សម្តេចមហាបវរធិបតី ហ៊ុន ម៉ាណែត បានណែនាំឱ្យកសាងការតភ្ជាប់ប្រទាក់ក្រឡាគ្នារវាង​ផែ​នីមួយៗ មិនត្រូវប្រកួតប្រជែងរវាងគ្នានោះទេ។ * សម្តេចមហាបវរធិបតី ហ៊ុន ម៉ាណែត បានថ្លែងថា កម្ពុជា កំពុងរៀបចំសួនឧស្សាហកម្មផ្នែកច្នៃគ្រាប់ស្វាយចន្ទីមួយនៅក្នុងខេត្តកំពង់ធំ។ ដើម្បីជំរុញឱ្យការធ្វើពាណិជ្ជកម្មនេះកាន់តែល្អប្រសើរ គឺត្រូវគិតពីការតភ្ជាប់រវាងសួនឧស្សាហកម្ម ជាមួយផែរបស់កម្ពុជា។ * សម្តេចមហាបវរធិបតី ហ៊ុន ម៉ាណែត បានថ្លែងថា ការធ្វើទំនើបកម្ម និងពង្រឹង​សមត្ថភាព​ផែ​របស់កម្ពុជា ជាការបង្កលក្ខណៈងាយស្រួលសម្រាប់តភ្ជាប់​ជាមួយ​ផែលើពិភពលោកជាដៃគូ។ * សម្តេចមហាបវរធិបតី ហ៊ុន ម៉ាណែត ណែនាំឱ្យកំពង់ផែស្វយ័តក្រុងព្រះសីហនុ ត្រូវបន្តជំរុញការកែទម្រង់ស្ថាប័ន និងការកសាងមូលធនមនុស្ស ដើម្បីបង្កើនផលិត​ភាព​ការងារ, គុណភាពសេវាកម្ម និង ប្រសិទ្ធភាពនៃប្រតិបត្តិការ​ឱ្យកាន់តែប្រសើរ​ឡើងថែម​ទៀត ជាពិសេសត្រូវសិក្សាអំពីតម្រូវការធនធានមនុស្ស, ទាំងបរិមាណ និងគុណភាព, ដោយផ្អែកលើទំហំការងារជាក់ស្តែង ការកំណត់តួនាទីភារកិច្ច, ការពិពណ៌នាការងារ, ការវាយតម្លៃលទ្ធផលការងារ, ការរៀបចំគោលនយោបាយ និង ប្រព័ន្ធបច្ចេកវិទ្យា ព័ត៌​មានសម្រាប់ការគ្រប់គ្រងធនធានមនុស្ស, ការកែទម្រង់រចនាសម្ព័ន្ធមុខងារ និង ការអនុវត្តការងារជាដើម។ * សម្តេចមហាបវរធិបតី ហ៊ុន ម៉ាណែត បានក្រើនរំលឹកថា បច្ចេកវិទ្យាទំនើបជារឿងល្អ តែបើមនុស្សគ្មានសមត្ថភាព ក៏មិនអាចប្រើបានដែរ។ ដូច្នេះការពង្រឹងសមត្ថភាពមនុស្ស ជាកិច្ចការចាំបាច់។ * សម្តេចមហាបវរធិបតី ហ៊ុន ម៉ាណែត ណែនាំក្រុមប្រឹក្សាភិបាល, ថ្នាក់ដឹកនាំ មន្ត្រីរាជ​ការ, បុគ្គលិក កម្មករ និយោជិត របស់កំពង់ផែស្វយ័តក្រុងព្រះសីហនុ ត្រូវបន្តខិតខំ​បំពេញការងារឱ្យបានកាន់ល្អថែមទៀត ដើម្បីបង្ហាញនូវសុឆន្ទៈ, សមត្ថភាព និង ប្រសិទ្ធ​ភាពការងាររបស់យើង ដើម្បីលើកកម្ពស់ការផ្តល់សេវាកំពង់ផែ ឱ្យកាន់តែប្រសើរ សម្រាប់បម្រើឱ្យវិស័យពាណិជ្ជកម្មកម្រិតអន្តរជាតិ ប្រកបដោយភាពប្រកួតប្រជែងខ្ពស់។ * សម្តេចមហាបវរធិបតី ហ៊ុន ម៉ាណែត ណែនាំក្រសួងសាធារណការ និង ដឹកជញ្ជួន និង ក្រសួងស្ថាប័នពាក់ព័ន្ធ ត្រូវបន្តបង្កើនកិច្ចសហការឱ្យបានជិតស្និទ្ធ ប្រកបដោយ​តម្លា​ភាព និងប្រសិទ្ធភាពខ្ពស់ ស្របតាមអភិក្រម «ជវភាពនៃប្រព័ន្ធតួអង្គតែមួយ» ដើម្បី​កែលម្អប្រព័ន្ធគ្រប់គ្រងសេវាកម្មគ្រប់ផ្នែក នៅក្នុងកំពង់ផែស្វយ័តក្រុងព្រះសីហនុ ឱ្យបានកាន់តែប្រសើរឡើង ដែលទាំងអស់នេះ មានសារៈសំខាន់បំផុតក្នុងការលើក​កម្ពស់​ការជឿទុកចិត្តពីសំណាក់អតិថិជន វិនិយោគិនជាតិ-អន្តរជាតិលើសេវាកំពង់ ផែ។ * សម្តេចមហាបវរធិបតី ហ៊ុន ម៉ាណែត បានថ្លែងថា នីតិវិធីការងារត្រួតគ្នា និងស្មុគស្មាញ ជាឧបសគ្គដល់ការធ្វើអាជីវកម្មនានា។ សម្តេចមហាបវរធិបតី ហ៊ុន ម៉ាណែត កោត​សរសើរកំពង់ផែស្វយ័តក្រុងព្រះសីហនុ ដែលបានអភិវឌ្ឍន៍សមត្ថភាពលើការ​គ្រប់គ្រង ធ្វើឱ្យសេវាកាន់តែលឿនរហ័ស។ * សម្តេចមហាបវរធិបតី ហ៊ុន ម៉ាណែត បានណែនាំកំពង់ផែស្វយ័តក្រុងព្រះសីហនុ ឱ្យពង្រឹងការគ្រប់គ្រងកុងតឺន័រ កុំឱ្យមានបញ្ហាអ្វីមួយនាំឱ្យខូចឈ្មោះរបស់ផែ។ * សម្តេចមហាបវរធិបតី ហ៊ុន ម៉ាណែត បានណែនាំថា ក្រុមហ៊ុនដែលចូលទៅវិនិយោគ​នៅតំបន់សេដ្ឋកិច្ច ហើយមិនប៉ះពាល់ដល់បរិស្ថាន គឺមិនចាំស្នើសុំ (EIA) នោះទេ។ តែក្រសួងបរិស្ថាន នៅតែអាចចូលទៅពិនិត្យ បើក្រុមហ៊ុននោះមិនអនុលោមបរិស្ថាន តំបន់សេដ្ឋកិច្ចពិសេសត្រូវតែទទួលខុសត្រូវ។ ការធ្វើបែបនេះ ដើម្បីកាត់បន្ថយភាពត្រួតគ្នាលើការស្នើសុំ (EIA) ។ * សម្តេចមហាបវរធិបតី ហ៊ុន ម៉ាណែត ណែនាំក្រសួងសាធារណការ និង ដឹកជញ្ជូន, ក្រុម​ហ៊ុនសាងសង់ និងក្រុមហ៊ុនទីប្រឹក្សាបច្ចេកទេស ត្រូវយកចិត្តទុកដាក់​ខ្ពស់ក្នុង​ការសាងសង់ និងត្រួតពិនិត្យបច្ចេកទេសគម្រោងសាងសង់ចំណតផែកុង​តឺន័រ​ទឹក​ជ្រៅថ្មីនេះ ឱ្យត្រឹមត្រូវតាមស្ដង់ដារបច្ចេកទេស និងប្រកបដោយគុណភាពខ្ពស់ និង បញ្ចៀសឱ្យបាននូវការប៉ះពាល់ជាអវិជ្ជមានលើបរិស្ថាននៅតំបន់ឆ្នេរសមុទ្រដ៏​ស្រស់​ស្អាត។ * សម្តេចធិបតី ហ៊ុន ម៉ាណែត បានថ្លែងបញ្ជាក់ឡើងវិញថា ពាក់ព័ន្ធការបញ្ជូនក្មេងទំនើងទៅបម្រើសកម្មភាពសមរភូមិជួរមុខ គឺមិនបង្កើតច្បាប់ថ្មីទេ។ * សម្តេចធិបតី ហ៊ុន ម៉ាណែត បានថ្លែងបញ្ជាក់ឡើងវិញថា ក្មេងទំនើងមិនបញ្ជូនទៅកាន់អាវុធនៅសមរភូមិជួរមុខនោះទេ គឺបម្រើសេវាសកម្មភាពសមរភូមិជួរមុខ ដូចជាចាក់ប៉េតុង ដាំបន្លែ ជាដើម៕

ព័ត៌មានទាក់ទង