ថ្លែងនៅក្រៅកិច្ចប្រជុំរដូវផ្ការីករបស់មូលនិធិរូបិយវត្ថុអន្តរជាតិ (IMF) ក្នុងទីក្រុងវ៉ាស៊ីនតោន លោក ឃ្លីងបេល បានគូសបញ្ជាក់ថា៖ «អ្វីដែលយើងអាចមើលឃើញនៅពេលនេះ គឺសង្គ្រាមនេះកំពុងធ្វើឱ្យប៉ះពាល់ដល់កំណើនសេដ្ឋកិច្ចរបស់ប្រទេសអាល្លឺម៉ង់»។ ការលើកឡើងនេះធ្វើឡើងស្របពេលដែលស្ថាប័ន IMF កាលពីថ្ងៃអង្គារ បានសម្រេចទម្លាក់ការព្យាករណ៍កំណើនសេដ្ឋកិច្ចរបស់អាល្លឺម៉ង់ មកនៅត្រឹម ០,៨ភាគរយ សម្រាប់ឆ្នាំ២០២៦ និង ១,២ភាគរយ សម្រាប់ឆ្នាំ២០២៧ ដែលតួលេខនេះបានធ្លាក់ចុះ ០,៣ភាគរយ បើធៀបនឹងការព្យាករណ៍កន្លងមក។ រដ្ឋមន្ត្រីហិរញ្ញវត្ថុអាល្លឺម៉ង់ លោក ឡាស ឃ្លីងបេល (Lars Klingbeil) នាថ្ងៃពុធ បានថ្លែងថា ទោះបីជាប្រទេសអាល្លឺម៉ង់មិនបានពាក់ព័ន្ធក្នុងសង្គ្រាមនៅប្រទេសអ៊ីរ៉ង់ក៏ដោយ ក៏ប្រទេសមួយនេះកំពុងទទួលរងនូវផលប៉ះពាល់ផ្នែកសេដ្ឋកិច្ចដោយផ្ទាល់ពីជម្លោះនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។ ជុំវិញវិបត្តិនៅតំបន់មជ្ឈិមបូព៌ា លោក ឃ្លីងបេល បានរិះគន់ចំពោះសង្គ្រាមនេះ ដោយបានជំរុញឱ្យភាគីពាក់ព័ន្ធប្រើប្រាស់មធ្យោបាយការទូតជាមួយអ៊ីរ៉ង់ ដើម្បីបញ្ឈប់ការប្រណាំងប្រជែងអាវុធនុយក្លេអ៊ែរ ជាជាងការប្រើប្រាស់ចំណាត់ការយោធា។ លោកបានសង្កត់ធ្ងន់ថា ការបង្កជម្លោះឱ្យរាលដាលពាសពេញតំបន់មិនមែនជាជម្រើសដ៏ត្រឹមត្រូវនោះទេ ហើយលោករំពឹងថាបណ្តាញការទូតនឹងអាចនាំទៅរកដំណោះស្រាយសន្តិភាពដ៏រឹងមាំ និងយូរអង្វែងមួយ៕

ព័ត៌មានទាក់ទង