យានរបស់ពួកគេបានចុះមកដល់លើផ្ទៃសមុទ្រ នៅក្បែរឆ្នេរភាគខាងត្បូងរដ្ឋ California កាលពីម៉ោង៥ល្ងាច (ម៉ោងនៅអាមេរិក)។ វាជាការបញ្ចប់បេសកកម្មមួយ ដែលបាននាំមនុស្សទៅឆ្ងាយបំផុតពីផែនដី គិតមកទល់ពេលនេះ។ បេសកកម្ម Artemis II ដែលបានទៅហោះឆ្វែលជុំវិញព្រះចន្ទ នៅចម្ងាយប្រមាណជាង៤០៦ ០០០គីឡូម៉ែត្រពីផែនដី គឺជាបេសកកម្មលើកដំបូងដែលមានផ្ទុកអវកាសយានិក និងដើម្បីត្រួសត្រាយផ្លូវសម្រាប់គោលដៅនាំអវកាសយានិក ត្រឡប់ទៅដល់លើ​ផ្ទៃព្រះចន្ទសាជាថ្មី នៅក្នុងឆ្នាំ២០២៨។ នាថ្ងៃសុក្រ ទី១០ ខែមេសា អវកាសយានិកទាំង៤នាក់នៃបេសកកម្ម Artemis II របស់សហរដ្ឋអាមេរិក បានចុះមកដល់ផ្ទៃផែនដីវិញដោយសុវត្ថិភាព ក្រោយចំណាយពេលជិត១០ថ្ងៃ ក្នុងលំហអវកាស សម្រាប់ការធ្វើដំណើរជាលើកដំបូង ដោយមនុស្សទៅកាន់ឋានព្រះចន្ទ ក្នុងរយៈពេលកន្លះសតវត្សរ៍។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។ ការចុះមកដល់ផ្ទៃផែនដីវិញដោយជោគជ័យនេះ បានដកចេញនូវឧបសគ្គចុងក្រោយដ៏សំខាន់ សម្រាប់យានអវកាស Orion ដែលផលិតដោយក្រុមហ៊ុន Lockheed Martin ពោលគឺវាបានបញ្ជាក់ថា យាន Orion អាចទ្រាំទ្រកម្លាំងកកិតដ៏ខ្លាំងសម្បើម នៃការវិលត្រឡប់ចូលស្រទាប់​បរិយាកាសផែនដី ក្រោយធ្វើដំណើរមកពីឋានព្រះចន្ទ។ កម្លាំងកកិតនឹងស្រទាប់បរិយាកាស បានធ្វើឱ្យផ្នែកខាងក្រៅរបស់យានអវកាស ឡើងកម្តៅរហូតដល់ ២៧៦០អង្សាសេឯណោះ។ គួរបញ្ជាក់ថា អវកាសយានិក Artemis II គឺជាក្រុមអវកាសយានិកដំបូងគេ ដែលបានធ្វើដំណើរទៅក្បែរឋានព្រះចន្ទ គិតចាប់តាំងពីសម័យកម្មវិធី Apollo របស់ទីភ្នាក់ងារអវកាស NASA កាលពីអំឡុង​ទសវត្សរ៍ឆ្នាំ១៩៦០-១៩៧០។ ពេលហោះឆ្វែលព្រះចន្ទ នៅចំហៀងដែលបែរចេញពីផែនដី ពួកគេបានធ្វើដំណើរដល់ចំណុចឆ្ងាយបំផុតមិនធ្លាប់មាន គឺ៤០៦ ៧១១គីឡូម៉ែត្រ លើសកំណត់ត្រាចាស់ ដែលមានចម្ងាយប្រហែល៤០០ ០០០គីឡូម៉ែត្រ សម្រេចបានដោយបេសកកម្ម Apollo 13 កាលពីឆ្នាំ១៩៧២។ លើកចុងក្រោយបង្អស់ ដែលអវកាសយានិកបានទៅជាន់លើផ្ទៃព្រះចន្ទ គឺក្នុងបេសកកម្ម Apollo 17 កាលពីចុងឆ្នាំ១៩៧២ ហើយមានតែសហរដ្ឋអាមេរិកមួយគត់ ដែលធ្លាប់បានធ្វើរឿងដ៏អស្ចារ្យមួយនេះ៕

ព័ត៌មានទាក់ទង