រាជធានីភ្នំពេញ៖ នាឱកាសថ្លែងសន្ទរកថាអញ្ជើញជាអធិបតីភាពក្នុងវេទិកាធុរកិច្ចកម្ពុជា-វៀតណាម ជាមួយលោក ឡេ មិញ ហ៊ឹង​ នាយករដ្ឋមន្ត្រីវៀតណាម នៅសណ្ឋាគារ សូហ្វីតែល ភ្នំពេញ ភូគីត្រា នាល្ងាចថ្ងៃទី០៩ ខែតុលា ឆ្នាំ២០២៦​ សម្តេចបវរធិបតី ហ៊ុន ម៉ាណែត បានថ្លែងអំណរគុណ និងវាយតម្លៃខ្ពស់ចំពោះក្រុមប្រឹក្សាអភិវឌ្ឍន៍កម្ពុជា ក្រសួងពាណិជ្ជកម្ម ស្ថានទូតវៀតណាមប្រចាំកម្ពុជា សភាពាណិជ្ជកម្មកម្ពុជា និងសមាគមធុរកិច្ចវៀតណាម-កម្ពុជា ដែលបានសហការរៀបចំវេទិកានេះឡើង។ វត្តមានរបស់ធុរជនកម្ពុជា និងវៀតណាមលើទឹកដីកម្ពុជា បានឆ្លុះបញ្ចាំងពីទំនុកចិត្ត និងចំណាប់អារម្មណ៍របស់វិស័យឯកជន ក្នុងការពង្រីកកិច្ចសហប្រតិបត្តិការផ្នែកពាណិជ្ជកម្ម វិនិយោគ និងធុរកិច្ចរវាងប្រទេសទាំងពីរ។ សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា រាជរដ្ឋាភិបាលធានាសុខសន្តិភាព ស្ថិរភាពនយោបាយ និងសេដ្ឋកិច្ច ព្រមទាំងប្រកាន់ខ្ជាប់គោលការណ៍ «បន្តស្តាប់ បន្តកែទម្រង់ បន្តសម្របសម្រួល និងបន្តដោះស្រាយបញ្ហាប្រឈម» ដើម្បីឱ្យវិនិយោគិនអាចចាប់ផ្តើម ពង្រីក និងបន្តវិនិយោគរយៈពេលវែង។ សម្តេចបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា៖ «រាជរដ្ឋាភិបាលកម្ពុជាប្តេជ្ញាចិត្តបន្តផ្តល់នូវមូលដ្ឋានគ្រឹះដ៏សំខាន់សម្រាប់ការវិនិយោគ ពោលគឺសុខសន្តិភាព ស្ថិរភាពសេដ្ឋកិច្ច និងនយោបាយ ព្រមទាំងការបន្តខិតខំប្រឹងប្រែងកែលម្អបរិយាកាសធុរកិច្ច និងវិនិយោគ។ យើងនឹងធ្វើជាដៃគូជាមួយវិស័យឯកជន នៅគ្រប់ដំណាក់កាលនៃការវិនិយោគ។ យើងនឹងបន្តស្តាប់ បន្តកែទម្រង់ បន្តសម្របសម្រួល និងបន្តដោះស្រាយបញ្ហាប្រឈមដើម្បីឱ្យវិនិយោគិននៅកម្ពុជា អាចចាប់ផ្តើមអាជីវកម្ម ពង្រីកប្រតិបត្តិការ និងបន្តវិនិយោគជាមួយយើងខ្ញុំក្នុងរយៈពេលវែង»។ សម្តេចបវរធិបតី ហ៊ុន ម៉ាណែត បានឱ្យដឹងថា កម្ពុជា និងវៀតណាមមានមូលដ្ឋានដ៏រឹងមាំ សម្រាប់បន្តពង្រីកកិច្ចសហប្រតិបត្តិការផ្នែកសេដ្ឋកិច្ច និងធុរកិច្ច។ កម្ពុជា និងវៀតណាម មានព្រំដែនជាប់គ្នា និងវិស័យជាច្រើនដែលអាចបំពេញឱ្យគ្នាទៅវិញទៅមក។ យើងត្រូវបន្តពង្រឹងការតភ្ជាប់ សម្រួលការវិនិយោគ ធុរកិច្ច និងពាណិជ្ជកម្ម និងបង្កើតលក្ខខណ្ឌកាន់តែអំណោយផល ដើម្បីឱ្យវិស័យឯកជននៃប្រទេសទាំងពីរអាចធ្វើការជាមួយគ្នាបានកាន់តែងាយស្រួល និងបង្កើតតម្លៃបន្ថែមកាន់តែច្រើន។ ក្នុងន័យនេះ សម្តេចបវរធិបតី ហ៊ុន ម៉ាណែត ក៏សូមលើកទឹកចិត្តដល់ធុរជន និងវិនិយោគិននៃប្រទេសទាំងពីរ បន្តស្វែងរកកាលានុវត្តភាពថ្មីៗ និងពង្រីកកិច្ចសហការពីការធ្វើពាណិជ្ជកម្ម ទៅកាន់ការវិនិយោគ ការផលិត ការកែច្នៃ និងការភ្ជាប់ខ្សែច្រវាក់ផ្គត់ផ្គង់ក្នុងតំបន់ឱ្យបានកាន់តែច្រើន។ «ខ្ញុំសង្ឃឹមថា វេទិកានាថ្ងៃនេះនឹងមិនបញ្ចប់ត្រឹមការផ្លាស់ប្តូរ យោបល់ និងនាមប័ណ្ណអាជីវកម្មនោះទេ ដូចដែលឯកឧត្តមនាយករដ្ឋមន្ត្រីវៀតណាម លើកឡើងក្នុងកិច្ចប្រជុំមុននេះ គឺរៀបចំនូវក្របខ័ណ្ឌកិច្ចសហប្រតិបត្តិការ និងការគិតគូរថ្មីនៃយន្តការថ្មីមួយ ដើម្បីពិភាក្សាគ្នាអំពីយុទ្ធសាស្ត្រក្នុងការតភ្ជាប់សេដ្ឋកិច្ចរបស់យើង ហើយបានលើកកម្រិតរហូតដល់ថ្នាក់ឧបនាយករដ្ឋមន្ត្រី ដើម្បីដឹកនាំកិច្ចការងារនេះទាំងសងខាង ក្នុងការដាក់ចេញយុទ្ធសាស្ត្ររយៈពេលវែងសម្រាប់កម្ពុជា និងវៀតណាម សម្រាប់តភ្ជាប់ខ្សែច្រវ៉ាកផលិតកម្មនេះ»។ នេះជាការគូសបញ្ជាក់បន្ថែមរបស់សម្តេចបវរធិបតី ហ៊ុន ម៉ាណែត។ សម្តេចបវរធិបតី ហ៊ុន ម៉ាណែត ចង់ឃើញការពិភាក្សាប្រែក្លាយទៅជាដំណើរទស្សនកិច្ចសិក្សាដល់ទីតាំង ភាពជាដៃគូ កិច្ចព្រមព្រៀង, និងគម្រោងវិនិយោគជាក់ស្តែងនៅឆ្នាំ២០២៧ និងឆ្នាំបន្តបន្ទាប់។ សម្តេចបវរធិបតី ហ៊ុន ម៉ាណែត ក៏សូមជូនពរវេទិកាធុរកិច្ចកម្ពុជា-វៀតណាម ឆ្នាំ២០២៦ ទទួលបានជោគជ័យដ៏ត្រចះត្រចង់ និងនាំមកនូវភាពជាដៃគូគម្រោងវិនិយោគ និងកាលានុវត្តភាពធុរកិច្ចថ្មីៗជាច្រើនសម្រាប់ប្រទេស និងប្រជាជនទាំងពីរ។ បន្ថែមពីនេះ សម្តេចធិបតី ហ៊ុន ម៉ាណែត​ បានឱ្យដឹងថា វេទិកានេះប្រព្រឹត្តទៅក្នុងពេលដែលស្ថានភាពតំបន់ និងសកលមានការប្រែប្រួលយ៉ាងឆាប់ និងស្មុគស្មាញដែលការណ៍នេះកំពុងជំរុញឱ្យមានការរៀបចំឡើងវិញនូវខ្សែច្រវាក់ផ្គត់ផ្គង់ និងការផ្លាស់ប្តូរនិន្នាការនៃការសម្រេចចិត្តក្នុងការវិនិយោគ។ ក្នុងបរិការណ៍នេះ អ្វីដែលគួរឱ្យកត់សម្គាល់នោះគឺកម្ពុជា និងវៀតណាមបន្តជ្រើសរើសយកការតភ្ជាប់កិច្ចសហប្រតិបត្តិការ និងការបំពេញឱ្យគ្នាទៅវិញទៅមក។ ទំនាក់ទំនងរវាងប្រទេសទាំងពីរ មិនត្រឹមតែបន្តរក្សាបាននូវភាពរឹងមាំ និងស្ថិរភាពប៉ុណ្ណោះទេ ប៉ុន្តែថែមទាំងកំពុងមានសន្ទុះកាន់តែខ្លាំង ទាំងក្នុងទំនាក់ទំនងពាណិជ្ជកម្ម វិនិយោគ ទេសចរណ៍ ការតភ្ជាប់ និងការផ្លាស់ប្តូររវាងប្រជាជន និងប្រជាជន៕

ព័ត៌មានទាក់ទង