ថ្លែងទៅកាន់សភា លោក អាន់វ៉ា ដែលកាន់តំណែងជារដ្ឋមន្ត្រីហិរញ្ញវត្ថុផងដែរនោះ បានបញ្ជាក់ថា ថវិកាជាតិនេះមានគោលដៅប្រែក្លាយកំណើនសេដ្ឋកិច្ចឱ្យទៅជាផលប្រយោជន៍ជាក់ស្ដែងសម្រាប់ពលរដ្ឋ តាមរយៈការដំឡើងប្រាក់ឈ្នួលអប្បបរមាពី ១,៧០០ រីងហ្គីត ដល់ ២,០០០ រីងហ្គីត ចាប់ពីខែមិថុនា ឆ្នាំ២០២៧ តទៅ លើកលែងតែសហគ្រាសធុនតូច និងមធ្យមដែលមានចំណូលក្រោម ៥០ លានរីងហ្គីត។ បន្ថែមលើនេះ រដ្ឋាភិបាលក៏បានកំណត់ប្រាក់បៀវត្សរ៍អប្បបរមា ២,៥០០ រីងហ្គីត សម្រាប់ពលករជំនាញមធ្យម និងនិស្សិតបញ្ចប់ការសិក្សា ព្រមទាំងបន្ធូរបន្ថយពន្ធលើប្រាក់ចំណូលសម្រាប់ពលរដ្ឋវណ្ណៈកណ្ដាលផងដែរ។ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) នៅថ្ងៃសុក្រនេះ បានប្រកាសដាក់ចេញសេចក្តីព្រាងថវិកាជាតិឆ្នាំ២០២៧ ក្នុងទំហំសរុប ៤៥៩.៨ ពាន់លានរីងហ្គីត (ប្រមាណ ១១២.៥ ពាន់លានដុល្លារ) ដោយផ្ដោតលើការសម្រាលបន្ទុកជីវភាពប្រជាជន តាមរយៈការបន្ធូរបន្ថយពន្ធ ដំឡើងប្រាក់ឈ្នួលអប្បបរមា និងការរុញច្រានវិស័យបច្ចេកវិទ្យា។ នេះបើតាមការចេញផ្សាយដោយទីភ្នាក់ងារសារព័ត៌មាន ស៉ីនហួរ (Xinhua) នៅថ្ងៃសុក្រ ទី៩ ខែតុលា ឆ្នាំ២០២៦។ ថ្លែងទៅកាន់សភា លោក អាន់វ៉ា ដែលកាន់តំណែងជារដ្ឋមន្ត្រីហិរញ្ញវត្ថុផងដែរនោះ បានបញ្ជាក់ថា ស្របពេលជាមួយគ្នានេះ រដ្ឋាភិបាលនឹងពន្យារពេលការលើកទឹកចិត្តពន្ធបៃតងរហូតដល់ចុងឆ្នាំ២០៣០ សម្រាប់ក្រុមហ៊ុនដែលបណ្តាក់ទុនលើថាមពលស្អាត ស្ថានីយសាករថយន្តអគ្គិសនី និងបច្ចេកវិទ្យាបៃតង។ ជាមួយគ្នានោះ ម៉ាឡេស៊ីបានបញ្ចេញមូលនិធិ ១០០ លានរីងហ្គីត ដើម្បីគាំទ្រក្រុមហ៊ុនផលិតបន្ទះឈីប (Semiconductor) និងឧស្សាហកម្មជឿនលឿនក្នុងរដ្ឋប៉េណាង (Penang) ព្រមទាំងពង្រីកមជ្ឈមណ្ឌលបច្ចេកវិទ្យានៅតាមរដ្ឋដទៃទៀត ដើម្បីទាក់ទាញការវិនិយោគពីបរទេស និងបង្កើតការងារជំនាញជូនប្រជាជន។ ដើម្បីទាក់ទាញក្រុមហ៊ុនពហុជាតិឱ្យមកបោះទីតាំងកាន់តែច្រើន ម៉ាឡេស៊ីក៏បានកំណត់អត្រាពន្ធអនុគ្រោះត្រឹមតែ ៥% លើប្រាក់ចំណូលដែលរកបានពីសកម្មភាពមជ្ឈមណ្ឌលសេវាកម្មសកល (Global Services Hub) សម្រាប់ក្រុមហ៊ុនបង្កើតថ្មី ដោយចាប់ផ្តើមអនុវត្តពីថ្ងៃទី១ ខែមករា ឆ្នាំ២០២៧ តទៅ៕

ព័ត៌មានទាក់ទង