ដោយនិយាយក្នុងលក្ខខណ្ឌមិនបញ្ចេញឈ្មោះ ប្រភពដដែលបន្ថែមថា អារ៉ាប៊ីសាអូឌីត នឹងមិនចុះចាញ់ការគំរាមកំហែង តាមបែបយោធារបស់ក្រុមហ៊ូទីដាច់ខាត។ នៅថ្ងៃនេះ អាជ្ញាធរអាកាសចរណ៍ស៉ីវិលអារ៉ាប៊ីសាអូឌីត ក៏បានឱ្យដឹងថា ពលរដ្ឋអារ៉ាប៊ីសាអូឌីត ៣នាក់បានស្លាប់ និងមួយចំនួនទៀតរងរបួសក្នុងការវាយប្រហារ ២លើក លើអាកាសយានដ្ឋានអន្តរជាតិ King Khalid នៅទីក្រុងរីយ៉ាដ កាលពីថ្ងៃព្រហស្បតិ៍។ អាជ្ញាធរបញ្ជាក់ថា អ្នករងរបួសមានទាំងស្រាល និងធ្ងន់ ហើយការវាយប្រហារនោះ បានបង្កការខូចខាតផ្នែកសម្ភារៈ ប៉ុន្តែប្រតិបត្តិការនៃអាកាសយានដ្ឋាន និងចរាចរណ៍ផ្លូវអាកាសបានត្រឡប់ទៅរកភាពប្រក្រតីវិញហើយ។ មន្រ្តីក្នុងតំបន់បានប្រាប់ទីភ្នាក់ងារសារព័ត៌មាន AFP នាថ្ងៃសុក្រ ទី៩​ ខែតុលានេះ ថាអារ៉ាប៊ីសាអូឌីត នឹងមិនយល់ព្រមលើបទឈប់បាញ់ជាមួយក្រុមហ៊ូទី (Houthis) ឡើយ រហូតទាល់តែរដ្ឋាភិបាលយេម៉ែនដែលខ្លួនគាំទ្រ អាចដណ្តើមយកទឹកដីទាំងអស់ដែលបានបាត់បង់ ក្នុងរយៈពេលប៉ុន្មានសប្តាហ៍ថ្មីៗនេះមកវិញ។ ក្រុមហ៊ូទី អះអាងថាពួកគេកំពុងកំណត់គោលដៅវាយប្រហារលើអារ៉ាប៊ីសាអូឌីត ដោយសារតែប្រទេសនេះគាំទ្រកងកម្លាំងរដ្ឋាភិបាល នៅក្នុងសង្គ្រាមស៉ីវិលនៅយេម៉ែន ដែលកំពុងផ្ទុះឡើងវិញ។ ចំណែកអារ៉ាប៊ីសាអូឌីតវិញ ថាខ្លួនកំពុងគាំទ្រប្រតិបត្តិការវាយបក របស់រដ្ឋាភិបាលយេម៉ែន ដែលត្រូវបានទទួលស្គាល់ដោយអង្គការសហប្រជាជាតិ ដើម្បីដណ្តើមយកទឹកដីមកវិញពីក្រុមហ៊ូទី៕

ព័ត៌មានទាក់ទង