បើយោងតាមរបាយការណ៍ស្រាវជ្រាវមួយដែលត្រូវបានដកស្រង់ចេញផ្សាយដោយ BBC ផ្អែកតាមក្រុមជំនាញវាយតម្លៃ Hope Not Hate បានធ្វើការប៉ាន់ប្រមាណថា សារបង្ហោះបែបឌឺដងជាតិសាសន៍មានច្រើនជាង ៣០ម៉ឺនត្រូវបានរកឃើញនៅលើបណ្តាញសង្គម x នៅអំឡុង World Cup 2026 ក្នុងរយៈពេល ៣៩ថ្ងៃ ដោយក្នុងនោះដែរមានចំនួន ៥,៥០០សារផងដែរ សំដៅដល់កីឡាករអង់គ្លេសផ្ទាល់តែម្តង។ ក្រុមកីឡាករបាល់ទាត់តោកំណាចអង់គ្លេស បានទទួលរងនូវការរើសអើងជាតិសាសន៍យ៉ាងដំណំ នៅអំឡុងប្រកួតប្រជែងជើងឯកបាល់ទាត់ពិភពលោក FIFA World Cup 2026 ដែលទើបបញ្ចប់កាលពីខែកក្កដា។ ខ្សែបម្រើ Jude Bellingham មកពីក្លិប Real Madrid បានក្លាយជាគោលដៅខ្លាំងក្លាជាងគេពីករណីរើសអើងជាតិសាសន៍ បន្ទាប់មកមានមិត្តរួមក្រុម Bukayo Saka និង Kobbie Mainoo ទៀតផង។ ជាមួយគ្នានោះ Djed Spence ដែលទើបកាន់សាសនាឥស្លាមនាប៉ុន្មានឆ្នាំចុងក្រោយនេះ ក៏បានក្លាយជាគោលដៅម៉ាក់ងាយជាតិសាសន៍យ៉ាងដំណំទៀតផង។ ទោះជាយ៉ាងណា វាពុំមែនជារឿងថ្មីឡើយដែលកីឡាករជម្រើសជាតិអង់គ្លេស ទទួលរងនូវរលកប្រកាន់ពូជសាសន៍នៅលើឆាកអន្តរជាតិ តួយ៉ាងក្រុមប្រទេសស្ថិតនៅតំបន់អឺរ៉ុបមួយនេះ បានរងការម៉ាក់ងាយជាតិសាសន៍យ៉ាងខ្លាំងផងដែរ កាលពីបរាជ័យផ្តាច់ព្រ័ត្រ Euro 2020 ក្នុងផ្ទះរបស់ខ្លួន ក្រោយចាញ់ប៉េណាល់ទីកាត់សេចក្តី ក្រោមថ្វិជើងរបស់អ៉ីតាលី៕

ព័ត៌មានទាក់ទង